លទ្ធផល​នៃ​ការ​សិក្សា​មួយ​ចុះ​ផ្សាយ​ដោយ​ទស្សនាវដ្តី​វិទ្យាសាស្រ្ត​ឈ្មោះ « Nature » កាល​ពី​ថ្ងៃទី៤ មករា​បាន​ឲ្យ​ដឹង​ថា ពិភពលោក​អាច​កាត់​បន្ថយ​ការ​ប្រើ​ជី​អាសូត​ដែល​ជា​ជីគីមី​សម្រាប់​ការ​ដាំដុះ និង​ថា ការ​កាត់​បន្ថយ​ជីកសិកម្ម​មួយ​នេះ​មិន​ធ្វើ​ឲ្យ​ដី​ខ្វះ​ជីជាតិ រួម​ទាំង​ផ្តល់​ផលចំណេញ​ដល់​បរិស្ថាន និង​សុខភាព​ទៀត​ផង។ តាម​លទ្ធផល​នៃ​ការ​សិក្សា​ដដែល ទោះ​បី​ជា​គេ​មិន​ប្រើ​ជី​អាសូត​នៅ​ក្នុង​ការ​ដាំដុះ​ក៏​ដោយ​ក៏​ទិន្នផល​ដែល​ទទួល​បាន​អាច​គ្រប់គ្រាន់​សម្រាប់​ចិញ្ចឹម​មនុស្សលោក​ដែល​នឹង​កើន​ដល់ ៩ ៧០០លាននាក់​នៅ​ឆ្នាំ ២០៥០ ខាង​មុខ។