នាយករដ្ឋមន្រ្តី​អ៊ីស្រាអែល​លោក​ណាវតាលី ប៊ែននែត​បាន​ទៅ​បំពេញ​ទស្សនកិច្ច​នៅ​ក្នុង​ប្រទេស​អេមីរ៉ាតអារ៉ាប់រួម។ តាំង​ពី​ប្រទេស​ទាំង​ពីរ​មាន​ទំនាក់ទំនង​ប្រក្រតី​រវាង​គ្នា​ក្នុង​ឆ្នាំ ២០២០ មក នេះ​ជា​លើកទី១ ដែល​មាន​ប្រមុខ​រដ្ឋាភិបាល​អ៊ីស្រាអែល​ម្នាក់​បាន​ដាក់​ជើង​ជាន់​ទឹកដី​អារ៉ាប់​មួយ​នេះ។ នៅ​ក្នុង​ទីក្រុង​អាប៊ូដាប៊ី លោក​ប៊ែននែត​បាន​ជួប​សន្ទនា​ជា​មួយ​រាជទាយាទ​អេមីរ៉ាតអារ៉ាប់រួម​ព្រះអង្គម្ចាស់​ម៉ូហាម៉េដ បេន ហ្សាយេដ។ កិច្ចការជំនួញ​ជា​ប្រធានរឿង​ចម្បង​នៃ​ជំនួប​រវាង​លោក​ប៊ែននែត និង​ព្រះអង្គម្ចាស់​បេន ហ្សាយេដ។ តែ​ទន្ទឹម​គ្នា​នេះ លោក​ប៊ែននែត​មិន​ភ្លេច​បញ្ជាក់​ពី​ជំហរ​របស់​អ៊ីស្រាអែល​ទាក់ទង​នឹង​បញ្ហា​នុយក្លេអ៊ែរ​អ៊ីរ៉ង់។