Við kynntumst Lindu Ársælsdóttur í þættinum í dag. Linda hefur eytt stórum hluta síðustu 10 ára annars vegar á Svalbarða og hins vegar á suðurskautslandinu og þess á milli hefur hún verið landvörður í Vatnajökulsþjóðgarði. Sem sagt eyðir hún vetrunum annars vegar á norðurhjara og hins vega á suðurhjara jarðarinnar. Svo vill svo skemmtilega til að Linda er frá Svalbarðseyri á Svalbarðsströnd í Eyjafirði, sem að minnsta kosti hingað til við höfum ekki haldið að væri með neina sérstaka tengingu við Svalbarða, eyjaklasan í Norður-Íshafi, aðra en nafnið, þangað til nú. Linda sagði okkur frá því hvað hún er að bralla á þessum ystu hjörum jarðar í þættinum í dag.

Á morgun fer fram fyrirlestur í hádegisfyrirlestraröð RIKK ? Rannsóknastofnunar í jafnréttisfræðum við Háskóla Íslands. Fyrirlesturinn nefnist Breytt afstaða til samkynhneigðar - Viðhorf Íslendinga yfir tíma. Sigrún Ólafsdóttir prófessor í félagsfræði við Háskóla Íslands, kom til okkar í dag og sagði okkur frá niðurstöðum rannsóknar, sem hún hefur verið að vinna ásamt Silju Bára R. Ómarsdóttur og Sunnu Símonardóttur, sem byggir á könnun sem hefur verið gerð reglulega frá árinu 1984. Það er óhætt að segja að afstaða Íslendinga til samkynhneigðar hefur breyst mikið á ekki lengri tíma.

Flestir vita hver Benny Andersson er, einn fjórði af ABBA og einn þekktasti lagahöfundur í heimi. Benny hefur í seinni tíð samið mikið af þjóðlagatónlist sem og kórtónlist og þetta er einkar áhugavert efni og sýnir nýja hlið á þessum merka lagahöfundi. Á morgun verða sérstakir tónleikar í Víðistaðakirkju tileinkaðir Benny Andersson og þar koma fram kórar, hljóðfæraleikarar og einsöngvarar. Við ræddum við Svein Arnar Sæmundsson stjórnanda í þættinum.

Tónlist í þættinum í dag:

Háa c / Moses Hightower (Steingrímur Karl Teague, Andri Ólafsson og Moses Hightower)

Ekkert mál / Elín Ey (Ragnhildur Gísladóttir)

Ástarsæla / Júníus Meyvant (Gunnar Þórðarson og Þorsteinn Eggertsson)

Du ar min man / Benny Anderson Orkester og Helen Sjöholm (Benny Andersson og Björn Ulvaeus)

UMSJÓN: GUNNAR HANSSON OG GUÐRÚN GUNNARSDÓTTIR