Í síðustu viku kom út ný rannsókn á vegum Stígamóta. Rannsóknin greinir tölfræðigögn þar sem skoðað er hvað einkennir þann hóp sem sækir þjónustu samtakanna vegna vændis í samanburði við fólk sem kemur til Stígamóta vegna annars kynferðisofbeldis. Niðurstöðurnar sýna alvarlegar afleiðingar vændis á líkamlega og andlega líðan brotaþola. Við fengum Steinunni Gyðu- og Guðjónsdóttur, talskonu Stígamóta, til að koma í þáttinn og með henni komu Gyða Margrét Pétursdóttir, prófessor í kynjafræði við Háskóla Íslands og Sveina Hjördís Þorvaldsdóttir, meistarafræðinema í kynjafræði, en þær sögðu frá meistaraverkefni Sveinu. Í verkefninu var leitað til kvenna sem hafa reynslu af vændi og þær spurðar hvaða úrræði þurfa að vera til staðar til að hverfa úr vændi ? eða hvernig þjónustu þær hefðu þurft sem forvörn gegn vændi.

Síðastliðið föstudagskvöld var frumsýnd í sjónvarpi og á netinu auglýsing sem vakti mikla athygli. Auglýsingin, Það má ekkert lengur, er hluti af vitundarvakningu VIRK um kynferðislega áreitni á vinnustöðum. Við fengum Ingibjörgu Loftsdóttur, sviðsstjóra forvarnarsviðs VIRK, til að koma í þáttinn til okkar og segja okkur frá þessari herferð og vitundarvakningunni.

Við fengum póstkort frá Magnúsi R. Einarssyni í dag. Áfram sagði Magnús af ferðum sínum um Evrópu, nú frá Frakklandi og Spáni. Hann heimsótti borgirnar Orange og Arles sem eru báðar frægar fyrir merkilegar og fornar byggingar og myndlistamenn. Hann sagði líka frá Salvador Dalí safninu î Figueres á Spáni, strandbænum Tossa de Mar og fleiri stöðum í Katalóníu. Hann endar í Palma de Mallorca og segir meðal annars frá stærsta diskoteki í heimi.

Tónlist í þættinum í dag:

Hlíðin mín fríða / GÓSS (F. Flemming og Jón Thoroddsen)

Time in a Bottle / Jim Croce (Jim Croce)

Stand By Me / Ben E. King (Ben E. King, Jerry Leiber og Mike Stoller)

UMSJÓN: GUNNAR HANSSON OG ÞORGERÐUR ÁSA AÐALSTEINSD.