នៅ​កាហ្សាក់ស្ថាន ប្រធានាធិបតី​លោក​កាស៊ីម តូកាយ៉េវ​បាន​បញ្ជាក់​នៅ​ក្នុង​សេចក្តីប្រកាសព័ត៌មាន​នា​ថ្ងៃ​អាទិត្យ ទី៩ មករា​ថា ស្ថានការណ៍​បាន​ត្រឡប់​ទៅ​រក​ភាព​ស្ងប់ស្ងាត់​វិញ​ហើយ។ គួរ​រម្លឹក​ថា ពលរដ្ឋ​កាហ្សាក់ស្ថាន​បាន​ចុះ​ផ្លូវ​ធ្វើ​បាតុកម្ម​ក្នុង​ថ្ងៃ​អាទិត្យ ទី២ មករា​ដើម្បី​ប្រឆាំង​នឹង​ការ​ឡើង​ថ្លៃ​តម្លៃ​ហ្កាស់។ បាតុកម្ម​ត្រូវ​បាន​កម្លាំង​សមត្ថកិច្ច​វាយបង្រ្កាប​យ៉ាង​ចាស់​ដៃ​ដោយ​បណ្តាល​ឲ្យ​ស្លាប់ របួស និង​ចាប់​ខ្លួន​ជា​ច្រើន​នាក់។ ក្រៅ​ពី​បាន​ប្រើ​កម្លាំង​ផ្ទៃក្នុង​ដើម្បី​ទប់​នឹង​បាតុករ​ហិង្សា និង​ប្រដាប់​អាវុធ ប្រធានាធិបតី​កាហ្សាក់ស្ថាន​លោក​កាស៊ីម តូកាយ៉េវ​បាន​សុំ​ជំនួយ​កម្លាំង​ពី​បរទេស ពិសេស​អង្គការ​នៃ​សន្ធិសញ្ញាសន្តិសុខ​រួម​ដែល​មាន​សមាជិក ៦ប្រទេស ក្នុង​នោះ​ក៏​មាន​រុស្ស៊ី​មួយ​ដែរ។