មួយរយៈពេលចុងក្រោយនេះ មានដំណឹងលេចឮជាបន្តបន្ទាប់ ស្តីអំពី​ការរកឃើញកូវីដទម្រង់បំប្លែងខ្លួនថ្មី ប្លែកៗមួយចំនួន។ ដំណឹងទាំងនេះ ត្រូវបាន​បណ្តាញព័ត៌មានខ្លះចុះផ្សាយ និងត្រូវបាន​គេចែកចាយតៗគ្នា តាមបណ្តាញសង្គមផងដែរ​ ធ្វើឲ្យ​មានការផ្អើលជ្រួលច្របល់ បូកផ្សំនឹងការភ័យខ្លាច។ ជាក់ស្តែង ដំណឹងលេចឮ ពីប្រទេសស៊ីប (Chypre) ស្តីពីការរកឃើញកូវីដ​បំប្លែងខ្លួន​ថ្មី ឈ្មោះ Deltacron ដែលគេអះអាងថា កើតចេញពីការ​ឆ្លងចូលគ្នា រវាងកូវីដ​ដែលតា និងអូមីក្រុង​។ បើទោះបីករណីបំប្លែងខ្លួនថ្មីទៀតនៃកូវីដ ពិតជាអាចកើតមាន ដោយមិនអាចចៀសបាន ក៏ប៉ុន្តែ អ្នកជំនាញមួយចំនួនបាន​លើកឡើងថា ​បណ្តាញព័ត៌មាន ក៏ដូចជាមហាជន មិនត្រូវ​ភ័យជ្រួលច្របល់ លឿនរហ័សពេកនោះទេ ល្គឹកណាមិនទាន់មានទិន្នន័យគ្រប់គ្រាន់ ព្រមទាំង​ការពិនិត្យ​ឲ្យ​បានល្អិតល្អន់ ទៅលើ​ទម្រង់កោសិកា នៃមេរោគបំប្លែងខ្លួនថ្មី​ទាំងនោះ។