台文翻譯：gina chan /校稿：林朝龍 /聲音：黃莉娟

主題：龜佮兔

古早古早，佇樹林內有一隻龜佮兔仔冤甲大細聲，𪜶咧炸講家己是偌𠢕走拄偌𠢕走，雙方攏毋認輸。落尾，𪜶決定欲來舉辦一場走標比賽，來拚一下仔懸低。

比賽一下開始，兔仔就若像一陣風衝咧做伊走去，一目𥍉就遠遠拚對上頭前去。伊越頭看，攏看無龜的影跡，心內真煬，想講：「嘿嘿嘿~我先來去樹仔跤小歇睏一下，才閣繼續比賽嘛猶會赴咧。」

想袂到，兔仔歇咧歇咧煞睏去矣。慢死趖的龜趁兔仔咧睏的時陣，拚勢爬仔爬仔爬，爬來到上尾站，完成比賽提著頭名。等兔仔睏精神，才知比賽已經結束，袂赴矣，龜已經提著冠軍囉。

   兔仔比賽輸去，心肝內足鬱卒，伊知影伊是傷過自信才會輸予龜。兔仔重新振作，決心欲佮龜閣比一擺，龜嘛真歡喜答應伊。這擺，兔仔毋敢閣激放放矣，伊一睏頭就走甲透，比龜緊咧幾若公里遠，總算共面子討轉來矣。

這聲，龜才智覺著家己佮兔仔的實力實在是天差咧地，伊知影以伊本身的條件，閣較按怎比嘛毋是兔仔的對手。雄雄去予伊想著一个妙計。伊隨叫陣出招，招兔仔閣再比一擺。毋過，這擺走標的路線愛換龜來安排，兔仔嘛真at-sá-lih就來答應伊。

比賽一下開始，兔仔仝款若像一陣風衝向前去，一目𥍉仔就來到溪仔邊，毋過，走標的盡尾煞設佇溪仔的對岸，兔仔看溪水遮掣流，煞毋知欲按怎才好。過誠久，彼隻慢死趖的龜嘛爬來到溪仔邊矣，看伊輕輕鬆鬆順勢落水泅到對岸去，順利爬到盡尾，贏著這擺的比賽。

這个故事咧共咱講「愛拚才會贏」，咱人毋通一下失敗就來放棄，經驗過失敗了後，愛閣較認真拚勢，揣出應變的計策佮方法，排除阻礙，最後成功一定是咱的。

留言告訴我你對這一集的想法： https://open.firstory.me/user/cmhxcxa39007r01w89fsc84k7/comments

Powered by Firstory Hosting