D'Zerstéierung vun Eschduerf an d'Kommunikatioun mat Doheem

Op Chrëschtdag 1944 war d'Ardennenoffensiv matzen amgaang. Besonnesch brutal waren d'Kämpf an der Géigend ronderëm Eschduerf. Wärend esouwuel op däitscher wéi och op alliéierter Säit vill Zaldoten hiert Liewe verluer hunn, huet d'Zivilpopulatioun musse flüchten an nokucken, wéi hier Haiser a Flamen opgaange sinn. Ma an der Zäit ronderëm Chrëschtdag hunn d'Zaldoten och besonnesch intensiv no hire Familljen an hirer Heemecht verlaangert. Wann een d'Bréiwer vun deemools liest, fält op, datt sech d'Hoffnungen an d'Ängscht vun den Amerikaner net grouss vun deene vun den Däitschen ënnerscheet hunn. Anescht war et iwwerdeems bei der offizieller Propaganda.