Óperettan „Meyjaskemman“ eftir Heinrich Berté fjallar um ævi tónskáldsins Franz Schuberts og fjórir af vinum hans koma fyrir sem persónur í óperettunni : Leopold Kupelwieser, Moritz von Schwind, Johann Michael Vogl og Franz von Schober. Þó að flest sem gerist í óperettunni sé skáldskapur voru þessir vinir Schuberts til í raun og veru og í þættinum „Á tónsviðinu“ fim. 28. maí kl. 14.03 verður fjallað um þessa fjóra vini tónskáldsins. Þeir voru allir listamenn hver á sínu sviði. Kupelwieser og Schwind voru báðir myndlistarmenn, Vogl var söngvari og Schober fékkst við sitt af hverju: myndlist, skáldskap og leiklist. Í þættinum verður meðal annars fluttur Kupelwieser-valsinn svonefndi sem Schubert samdi fyrir brúðkaup Kupelwiesers árið 1826. Valsinn var ekki gefinn út á prenti og varðveittist ekki heldur í handriti. Hins vegar var hann spilaður á píanó hjá Kupelwieser-fjölskyldunni, kynslóð eftir kynslóð, og varðveittist þannig þar til tónskáldið Richard Strauss skrifaði hann upp árið 1943 eftir píanóleik Mariu Mautner Markhof. Umsjón með þættinum hefur Una Margrét Jónsdóttir.