Son José Antonio, e isto é Conxecturas.

Esta semana, durante varios días, acabei todos os prestos que sigo, até o punto de que entraba a media tarde e non tiña nada coñecido que escoitar. Non se me deu tampouco por descubrir prestos novos.

Contaba onte, despois de moito tempo sen publicar, @expattere, "Total, ¿para qué?" E dinos que non publica desde hai máis dun mes non porque non tivese nada que contar, senón polo que denomina unha sensación tonta de "total, para que". Pois a verdade é que me gusta escoitar a súa voz e as súas historias, coa chuvia de fondo, en 49N 2W, un sitio onde realmente existe a roupa de entretempo e que nos leva a un territorio que parece inventado.

Alégrame que outros prestocasters, que sigo diariamente, @galegogeek, @jeanbedel e @dmarzal comentasen este presto, que non sei se responde á pregunta do presto, mais que demostran que o que Teresa comenta resoa coma son das ondas dun día de inverno na Canle da Mancha (dígoo polas películas, xa que nunca estiven alí).