Actualidade Mediodía

A borrasca Bruna deixa unha xornada marcada pola inestabilidade meteorolóxica en Galicia, con avisos por chuvias intensas, treboadas e fortes ventos que afectan tamén á nosa comarca.

Neste informativo falamos do accidente de tráfico rexistrado en Parada no que resultou ferida unha veciña de Cereixo, do remate do prazo para presentar alegacións aos proxectos eólicos Monte Arca Norte e Sur, e da multitudinaria xornada de convivencia do programa +Convivir que reuniu máis dun milleiro de persoas na Estrada.

Ademais, coñecemos os traballos de mellora que o obradoiro A Estrada Emprega Foresta está a realizar no polígono de Toedo, a campaña informativa da Garda Civil dirixida ás persoas maiores das parroquias e a polémica política tras as críticas do BNG pola presenza de símbolos vinculados ao franquismo no rueiro municipal.

Tamén repasamos a actualidade social e sanitaria coa presentación da nova Comisión de Festas da Estrada, o recoñecemento ao Centro de Saúde estradense como finalista aos premios nacionais de Atención Primaria, a ampliación da campaña da gripe e as valoracións de Carla Rey tras a súa participación no certame RNB Miss Galicia.

No bloque comarcal falamos do ingreso en prisión dun home investigado por varios roubos con forza en Padrón e Dodro, da nova expedición científica á Antártida do mariño lalinense Alejandro Martínez Dobarro e da autorización para retomar as obras do parque de Silleda conservando as sepulturas medievais descubertas.

E nos deportes, revivimos a emotiva volta do CD Estradense ao Novo Municipal tras as obras de mellora, analizamos o empate diante do Gran Peña e repasamos os resultados da fin de semana no fútbol e fútbol sala da contorna. Ademais, destacamos o subcampionato acadado por Iziar Barcala no Máster Absoluto N1 de Xixón.

Neste informativo local repasamos os principais asuntos da actualidade da Estrada e da comarca. Abrimos coa sinatura do convenio polo que a Xunta achegará 400.000 euros para renovar a área recreativa da praia fluvial do río Liñares. Tamén falamos do avance das obras de mellora das cunetas na estrada provincial entre O Sol e Pardemarín, xa na súa recta final, e da nova xornada de convivencia veciñal que se celebrará este sábado na Estrada con actividades para todas as idades.

Ademais, contamos os detalles da conmemoración do Día Mundial do Urbanismo, cunha exposición dedicada á evolución da vila a través de 14 edificios históricos; analizamos as críticas formuladas polo PSOE sobre a repercusión da suba de SOGAMA e repasamos a intensa programación cultural dos próximos días, que inclúe o concerto do 30 aniversario da Coral Polifónica Estradense, teatro, música, humor e propostas nas parroquias.

No ámbito cultural e social destacamos a visita do grupo De Vacas ao Obradoiro de Música Moderna Carlos Barruso, os magostos previstos en Matalobos e Ouzande, o inicio dunha nova tempada para Bonsái A Estrada e a participación de Carla Rey no certame Miss RNB Galicia.

Nas comarcas falamos do incendio que destruíu un alpendre en Filgueira, da continuidade da docencia telemática de latín e grego no IES Marco do Camballón, da reunión informativa sobre o programa Vacacións en Paz en Cerdedo-Cotobade e da última andaina do ciclo Vémonos no Camiño entre Bandeira e Ponte Ulla.

E no bloque deportivo, repasamos os preparativos da gran festa do Estradense para regresar ao Novo Municipal, a previa do encontro fronte ao Gran Peña, os cambios no atletismo estradense tras seis anos de vinculación co Ourense Atletismo e a aventura dos equipos da Estrada e Silleda no Chatarras Raid con destino a Marrakech.

No informativo de hoxe repasamos a actualidade máis destacada da xornada. A CIG chama a secundar a folga xeral do vindeiro 11 de novembro cunha mobilización na Estrada, mentres o Concello fixa os servizos mínimos de Axuda no Fogar para esa mesma convocatoria.

Tamén falamos da visita do conselleiro de Educación, Román Rodríguez, ás instalacións nas que Aspanaes poñerá en marcha dúas unidades de educación especial, e dos asuntos que centran o pleno municipal desta noite, entre eles a memoria democrática e a eliminación da violencia contra as mulleres.

Ademais, analizamos a participación da Estrada nun novo programa de emprego xunto con outros cinco concellos para favorecer a inserción laboral das persoas desempregadas e a adhesión do municipio á novena edición de Vilas en Flor.

No apartado cultural, achegámonos ó espectáculo musical de Manoele de Felisa sobre a obra de Otero Pedrayo, á Festa do Outono de Ouzande e ás actividades infantís previstas na Biblioteca Municipal arredor de Virxinia Pereira e Castelao.

Completa a actualidade local a necesidade de resintonizar desde hoxe as canles da TDT nos televisores que reciben a sinal a través da antena.

Nas comarcas, falamos do incendio de tres vehículos en Caldas de Reis tras unha avaría nun coche, das críticas do BNG polos atrasos nas concentracións parcelarias de Lalín, do acordo entre o Concello de Teo e a Fundación ONCE para impulsar o emprego das persoas con discapacidade e das modificacións nas conexións ferroviarias provocadas polo peche temporal da estación da Coruña.

E nos deportes, destacamos o novo éxito de Ana Masaguer e Nala no panorama estatal do agility, acadando un destacado posto entre as mellores participantes da competición.

️ O fume volve protagonizar a actualidade en Galicia. Coa reactivación das queimas agrícolas e forestais, as columnas de fume e o cheiro a queimado deixáronse sentir en numerosos puntos do territorio. Abrimos o informativo lembrando a importancia da prudencia e repasando tamén o balance da campaña de incendios presentado pola Consellería do Medio Rural.

️ Ademais, nos titulares locais falamos da polémica arredor do punto limpo da Estrada e das súas normas de uso, da futura subida das tarifas de Sogama, da evolución da situación hídrica no municipio, das obras de mellora da estrada EP-7001 cara Forcarei e da apertura do prazo para solicitar parcelas a través do Banco de Terras de Galicia.

Completan a actualidade a exposición fotográfica organizada por Mulleres que Poden con motivo do Día Mundial do Urbanismo, a cancelación definitiva do desfile de Samaín da ACOE e a celebración do Magosto de Matalobos.

No bloque comarcal abordamos o ingreso na UCI dun excursionista tras un accidente en Cuntis, a localización en bo estado do octoxenario desaparecido en Monterroso, un accidente de tráfico en Lalín, o proxecto de recuperación da aldea abandonada de Remesar e a recuperación do Premio de Relato Curto Nélida Piñón en Cerdedo-Cotobade.

No informativo de hoxe abrimos coa incidencia rexistrada na Praza do Concello da Estrada, onde a letra «T» do emblemático rótulo da vila sufriu un percance sen que houbese que lamentar danos maiores.

Tamén contamos todos os detalles da presentación do cuarto vehículo eléctrico que o Concello pon a disposición da veciñanza dentro do servizo de mobilidade compartida. Ademais, coñecemos a nova edición de +Convivir, unha xornada con actividades para todas as idades que se celebrará este sábado na Estrada.

Repasamos igualmente o sorteo realizado para designar os membros das 39 mesas electorais de cara ás eleccións do próximo 29 de novembro e facémonos eco da campaña municipal para fomentar o uso do contedor marrón e reducir os custos da xestión dos residuos.

No ámbito económico e empresarial, falamos do obradoiro impulsado pola ACE da Estrada para aprender a emprender coa axuda da intelixencia artificial. E en materia sanitaria, informamos do inicio da nova campaña de vacinación contra a gripe para as persoas maiores de 60 anos e as embarazadas en Galicia.

Nas comarcas, seguimos a busca dun veciño de Rodeiro desaparecido na feira de Monterroso, achegámonos á homenaxe a Neira Vilas en Vila de Cruces e repasamos o programa das festas de San Martiño en Teo.

Nos deportes, escoitaremos a entrevista con Miguel Pereira, que pon fin á súa brillante traxectoria no culturismo natural tras conquistar sete títulos mundiais e nove campionatos de España. Ademais, analizamos a destacada actuación do Club Atletismo A Estrada no Cross Ponte Romana.

Neste informativo de hoxe, coincidindo coa celebración do Día de Defuntos, abrimos lembrando unha xornada dedicada á memoria dos seres queridos que xa non están entre nós, despois dunha fin de semana marcada polas visitas ós cemiterios, as flores e os recordos.

Entre os principais asuntos da actualidade, falamos do xuízo que celebrará mañá a Audiencia de Pontevedra contra tres persoas acusadas de vender cocaína na Estrada, dos roubos reiterados no cemiterio de San Paio que provocaron a indignación das familias, e da recuperación do histórico acueduto de Leira tras unha importante intervención patrimonial.

Ademais, abordamos a mellora de viarios en Callobre, a prórroga do contrato para a lectura dos contadores da auga, o sorteo das mesas electorais para os comicios do 29 de novembro, a reapertura dos permisos de queimas agrícolas e forestais e a incorporación dun novo funcionario á Policía Local estradense.

Tamén destacamos o recoñecemento a Codeseda Viva co Premio Raíces do Rural, os cambios nas datas dos Premios San Martiño e do espectáculo de Yllana, e o éxito de participación do Samaín na Estrada durante toda a fin de semana.

Na información comarcal repasamos, entre outros asuntos, a despedida en Cerdedo-Cotobade de María del Carmen Vázquez, falecida no accidente ferroviario de Toledo; unha detención por un presunto caso de violencia de xénero en Lalín; unha nova campaña de recollida de plásticos agrícolas en Silleda; e a creación dunha senda peonil en Forcarei cun investimento de 570.000 euros.

No apartado deportivo, analizamos o empate do CD Estradense en Cangas fronte ó Alondras CF (1-1), repasamos toda a xornada de fútbol e fútbol sala da comarca e achegámonos á despedida do culturista estradense Miguel Pereira Pola, que pecha a súa carreira cun impresionante palmarés de sete títulos mundiais.

Ás portas de Todos os Santos e do Día de Defuntos, o Samaín volve cobrar protagonismo nas parroquias da Estrada cun amplo programa de actividades para todas as idades. Neste informativo repasamos as celebracións previstas para a fin de semana e facemos balance doutras citas culturais e sociais da comarca.

Ademais, falamos da denuncia por unha presunta suplantación de identidade sufrida polo párroco José Antonio Ortigueira, do informe técnico recibido polo Concello sobre os proxectos eólicos Nesa Monte Arca Norte e Sur e do remate das obras de asfaltado en Couso.

Tamén abordamos o debate municipal sobre o cambio de nome das rúas Calvo Sotelo e IRYDA, as axudas concedidas pola Xunta a Acapaf e Agadea, a oferta de emprego da Fundación de Exposicións para a Feira de Antigüidades e os cambios na programación cultural debido aos días de loito oficial.

No apartado do Samaín, contamos o aprazamento do desfile organizado por ACOE, así como as distintas actividades que se desenvolverán nas parroquias estradenses durante estes días. Ademais, achegámonos ao curso de Danza do Entroido da Ulla promovido pola asociación A Xesteira de Couso e á chegada do programa «Circo no Camiño» á Estrada.

Nas comarcas, falamos do novo aparcadoiro habilitado en Silleda xunto ao cemiterio de Santa Eulalia, da homenaxe da Fundación Xosé Neira Vilas ao autor de Memorias dun neno labrego e da andaina que unirá A Bandeira con Ponte Ulla.

⚽ Nos deportes, previa completa da fin de semana co encontro do CD Estradense fronte ao Alondras CF, a despedida internacional do culturista Miguel Pereira Pola e a participación de cinco atletas estradenses nunha competición en Lugo xunto a deportistas olímpicos e medallistas internacionais.

A traxedia ferroviaria rexistrada en Toledo, que deixa xa 69 persoas falecidas, marca a actualidade deste informativo e condiciona tamén a vida pública e cultural da Estrada. O municipio sumouse aos tres días de loito oficial cun minuto de silencio en memoria das vítimas e coas bandeiras da praza do Concello a media hasta. Ademais, o goberno local decidiu adiar os actos culturais previstos para esta fin de semana.

No repaso da actualidade local, informamos da recepción das obras de mellora do punto limpo, dos tres cortes no subministro eléctrico rexistrados no municipio e da denuncia presentada polo párroco José Antonio Ortigueira tras sufrir unha suplantación de identidade a través do seu número de teléfono. Tamén falamos da charla organizada pola Garda Civil en Codeseda para previr estafas e roubos, das críticas do BNG á proliferación de proxectos eólicos na Estrada e dunha conferencia da Asociación Española Contra o Cancro sobre o apoio ás familias. Ademais, a ACOE mantén parte da súa programación de Samaín.

Nas comarcas, repasamos os avances de Ames e Teo en administración electrónica e a homenaxe de Valga a Manuel López Castro e Pepe Potel, que darán nome a dúas salas do Auditorio Municipal.

E na información deportiva, coñecemos os últimos retos do culturista estradense Miguel Pereira Pola, que afronta a súa derradeira competición mundial tras unha brillante carreira, e falamos da participación de cinco atletas estradenses nunha cita en Lugo na que competirán con deportistas olímpicos e medallistas internacionais.

Neste informativo damos conta do grave accidente ferroviario rexistrado esta mañá na provincia de Toledo, no que perderon a vida polo menos 50 persoas e máis de 179 resultaron feridas tras a colisión entre dous trens de alta velocidade. Repasamos tamén as reaccións institucionais, coa cancelación de axendas oficiais por parte de distintas administracións e a convocatoria dun minuto de silencio ás 20:00 horas diante dos concellos, á que se suma o Concello da Estrada.

Ademais, nos titulares locais falamos da sinalización e acondicionamento de tres rutas das fervenzas impulsadas polo Concello e Mar de Compostela, das alegacións contra os proxectos eólicos que afectan A Estrada, Cuntis e Campo Lameiro, da comisión sobre o 25N, da convocatoria urxente para abordar a memoria democrática e do sorteo das mesas electorais previsto para o próximo 2 de novembro.

Tamén informamos da reunión entre Codeseda Viva e o alcalde para analizar a situación do Camiño da Geira e dos Arrieiros, da recuperación dos xogos tradicionais en Berres con motivo do 150 aniversario de Manuel García Barros e da intensa actividade nas floristerías estradenses ante a celebración do Día de Defuntos.

Na información comarcal repasamos o accidente de tráfico rexistrado na estrada entre A Bandeira e Merza e a evolución da investigación da pelexa ocorrida en Lalín.

E no bloque deportivo, achegámonos á participación de cinco atletas estradenses no Optimilk Cross Nacional Ponte Romana de Lugo.

No informativo de hoxe falamos da rápida intervención dos servizos de emerxencias para extinguir un incendio nunha vivenda da avenida de Pontevedra. Ademais, veciños de Tabeirós denuncian o roubo de cable de cobre nas farolas públicas de Rebordelo, mentres que a Policía Local da Estrada alerta dun novo método de roubo en aparcadoiros baseado no engano das moedas.

Repasamos tamén o inicio dun novo plan de asfaltados no rural estradense, cun investimento superior ós tres millóns de euros, e as novidades do Nadal na Estrada, que contará con máis de medio millón de luces LED e unha gran árbore de 22 metros na Praza de Galicia. Completa a actualidade local o anuncio das podas previstas nas principais rúas do municipio.

No ámbito económico, achegamos toda a información sobre a nova edición do Bono Activa Comercio, que poderá descargarse desde este mércores con descontos de ata 15 euros por compra. Tamén destacamos o recoñecemento acadado por Xián Sánchez, alumno do IES Antón Losada Diéguez, galardoado cun premio de 1.000 euros polo seu excelente rendemento académico na ESO.

Nas comarcas, Lalín rexistra o primeiro detido relacionado coa multitudinaria pelexa nocturna, e Silleda retoma os traballos de mellora dos camiños rurais con maquinaria da Mancomunidade e medios propios.

⚽ Na información deportiva, coñecemos a participación estradense no Chatarra Raid, unha aventura solidaria de cinco etapas na que equipos locais competirán con vehículos clásicos combinando deporte, solidariedade e superación.