Biographical account of Korea’s hero and greatest admiral narrated in Ilocano. This is the last of 3 parts.

EXCERPT:

"...Ni Won Gyun ti insukat ni Ari Seonjo ken ni Yi a nangiggem iti armada. Idi naited kenkuana ti otoridad, ammo met idi ni Won Gyun a daydi impormasyon daydi espiya ket ulbod ngem nagtuloy a namati ti korte ti ari kadagidi palso nga iyin-inpormar ti espiya ti Hapon. Binilinda ni Won nga rautenna dagidi Hapon idiay Ungchon. Awan ti armas idi dagidi Hapon gapu ta natalged daydi nairusat a tulag ti nagbaetan ni Ari Seonjo ken dagiti Hapon a pannakaisardeng ti sinnaranget. Naparmek dagidi Hapon ngem napukawan ni Won ti maysa a bapor a pakigubat. Kasta met a napukawna daydi kapitan daytoy. Nakaawat ti surat a protesta manipud iti komander a Hapon ni Won maipanggep iti daydi pananrautda. Ngem nakaawat man metten ti bilin ni Won manipud iti ngatoenna a ‘Field Marshall’ a ni Gwon Yui. Inbagana daydi bilin ti Ari a mapanda rumaut idiay Busan. Nupay nagsarimadeng idi ni Won, daydi bilin ket naggapu iti Ari ket iti kasta, kasapulan nga ibanagda. Kamaudianna, kaduana ni Komander Yi Eok Ki, nagturongda ngarud idiay Busan.

Idi un-una, nagat-atras dagidi Hapon, ngem palab-og laeng daydi. Ti kinaagpaysona ket nakasagana dagidi Hapon a mangdadael iti armada dagiti Koreano sakbay nga ipakatda ti panangokupada iti pagilian a Korea. Nakaad-adu idi dagidi bapor ti Hapon nga inmatonan ni Todo Takatora. Ammo idi ni Won a maparmekda ngem awan ti mabalinanna no di lumaban a kas bilin ti Ari. Iti daydi napasamak a panagsinnaranget idiay Chilcheonryang idi maika DUAPULO KET PITO KEN DUAPULO KET WALO (27-28) ti Agusto MIL SINGKO SIYENTOS SIYAM A PULO KET PITO (1597), inlupit-lupit dagidi Hapon ti puersa a Joseon. Nagbilang iti LIMA GASUT (500) agingga iti sangaribu a bapor ken SANGAGASUT KET UPPAT A PULO A RIBU (140,000) a mannakigubat daydi insango ti Hapon. Iti daytoy a sinnaranget ngan-ngani napukaw amin dagiti bapor dagiti Koreano. Iti daydi DUA GASUT (200) a baporda, napukaw a nadadael ti SANGAGASUT KET WALO PULO KET WALO (188). Napukawan pay ti adu a mannakigubat ti Joseon. Immatras dagiti Joseon iti maysa a nailet a karayan iti nagbaetan ti Geoje ken Chilchon. Idiay, napan nagpakni ni Won Gyun idiay daulo a bapor ti armadana ket nagkedked a simmango wenno nakiinnuman iti uray sinno. Nagyan idiay daydi nabati a kameng iti entero nga armada ti makalawas.

Kabayatanna, nagplano dagidi komander a Hapon iti panangraut kadagiti Koreano. Nangummong ni Shimazu Yoshihiro idiay Geoje ti DUA RIBU (2,000) kadagiti samuraina. Inurnosna dagitoy idiay akin-Amianan-Laud a paset ti daga a tumung-tungraraw iti armada dagiti Joseon iti taaw nga adda iti baba. Iti rabii ti maika DUAPULO KET WALO (28) ti Agosto, rimmaut ti LIMA GASUT (500) a bapor a napan iti daydi nailet a karayan. Idi dimteng ti agsapa, ngan-ngani aminen dagidi bapor ti Koreano ket nadadaelen. Timmakias a naglibas ni Won Gyun a napan iti daga. Ngem dina naanduran ti nakitinnaray kadagiti taona. Nagsardeng daytoy a naginana iti sirok ti kayo a nakakamatan ti maysa a Hapon kenkuana. Naipagarup a pinugotan daydi Hapon ti ulona. Uray ni Yi Eokgi ket natay met a nalmes iti daytoy a sinnaranget."

CONTINUE TO PODCAST FOR THE FULL Part 3 (of 3 parts) EPISODE.