聽講有人跳規世人的舞，結婚了，嘛生一個真古錐的查某囝。有一擺伊𤆬怹查某囝去看醫生，為著欲予醫生會當順利聽查某囝的心音，做老母的就跟查某囝耍扮公伙仔，家己先予醫生聽予查某囝看，結果醫生聽了有雜音，感覺怪怪，就建議這位媽媽去大病院做較詳細的心臟檢查。

檢查煞，醫生看到啥就愛講啥，醫生若無講，萬不利發生啥物意外，予病人告就吃力了！不過，醫生講的攏是統計的數字，伊嘛無跟咱住做伙，毋知影咱的生活習慣，干呢看機器的檢查報告爾爾，照理講，咱家己應該比醫生較知影咱的身軀有佗位重瘩無才對。

這條新聞誠大條，後來發生啥物代誌應該大家攏知。我想欲講的是，醫生有醫生的立場，伊毋是欲跟咱恐嚇，伊只是分析統計資料的危險予咱聽爾。人講一樣米飼百樣人，高矮胖瘦體格嘛百百款，無兩個人生做一模一樣的，醫生的話咱愛重視，但是咱嘛應該愛閣較相信咱家己才對，明明無代誌，毋通看到影就開槍，無采咱跟咱這身軀已經逗陣幾若十冬矣，干呢予機器照一下就變無熟似，變遐生份，按呢敢對？