Poet: Ameer Minai

KHalaq ke servar, shaafa-e-mahshar, sallaaho alaihe-vasallam 

mursal-e-daavar-e-KHaas payambar, sallaaho alaihe-vasallam 

nuur-e-mujassam, nayyar-e-aazam, survar-e-aalam, muunis-e-aadam 

nuuh ke hamdam, KHizr ke rahbar, sallaaho alaihe-vasallam 

faKHr-e-ayaa.n hai.n, arsh-e-makaa.n hai.n, shaah-e-shahaa.n hai.n, saif-e-zabaa.n hai.n 

sab pe ayaa.n hai.n aap ke jauhar, sallaaho alaihe-vasallam 

bahar-e-saKHaavat, kaan-e-muravvat, aaya-e-rahmat, shaafe.a-e-ummat 

maalik-e-jannat, qaasim-e-kausar, sallaaho alaihe-vasallam 

qibla-e-aalam, ka.aba-e-aazam, sab se muqaddam raaz ke mahram 

jaan-e-mujassam, ruuh-e-musavvir, sallaaho alaihe-vasallam 

daulat-e-duniyaa KHaak baraabar, haath ke KHaalii dil ke tava.ngar 

maalik-e-kishvar taKHt na afsar, sallaaho alaihe-vasallam 

rahbar-e-muusaa, haadii-e-iisaa, taarik-e-duniyaa, malak-e-uqbaa 

haath kaa takiya, KHaak kaa bistar, sallaaho alaihe-vasallam 

chashma-e-jaarii, KHaassa-e-baarii, gard-savaarii baad-e-bahaarii 

aa.iina-daarii, faKHr-e-sikandar, sallaaho alaihe-vasallam 

mehr se mamluu, resha resha ne.amat, 'amiir' apnaa hai pesha 

dard hamesha rahtaa hai aksar, sallaaho alaihe-vasallam