Orgelkvartettinn Apparat (Apparat Organ Quartet) er ótrúlega skemmtilegt fyrirbæri ? fjögur orgel og trommari. Þessi magnaða hljómsveit fagnar um þessar mundir 20 ára afmæli fyrstu plötunnar: Apparat Organ Quartet. Liður í hátíðahöldum eru tónleika í Tjarnarbíói á miðvikudaginn næsta, 26. Október, en þar mun hljómsveitin flytja plötuna í heild sinni og svo eflaust bæta einhverju við. Platan hlaut frábærar viðtökur þegar hún kom út og ekki bara hérna á Íslandi, heldur líka í útlöndum ? í erlendum miðlum á borð við New York Times. Fyrir vikið varð hljómsveitin eftirsótt tónleikaband og spilaði á tónlistarhátíðum um allan heim; Hróarskeldu, Lowlands festival, Central Park í New York og Pompidou miðstöðinni í París t.d. Árið 2009 var platan valin ein af 100 bestu plötum Íslandssögunnar í viðamikilli kosningu sem endaði í frábærri bók sem Arnar Snævar Eggertsson og Jónatan Garðarsson skrifuðu. Þeir Apparats-menn, Úlfur Eldjárn og Hörður Bragason eru gestir Rokklands í dag.