牽仔最近誠認真咧學英文，定定會聽到手機仔講一句，伊綴咧唸一句。有當時仔，早早就去睏的我，已經睏一醒起來翻身矣，伊閣猶未來睏，換衫間的火是開到光龐龐，一句一句聽到伊佇彼咧綴手機仔唸英文。

我最近是因為參加合唱團了，上台欲唱的十外條歌攏毋捌聽過唱過，驚會綴人未著，才會規工拼生命咧練唱。阮牽仔就毋知是按怎，嘛若像予啥物物件牽去仝款，無代誌嘛無愛較早去睏，三更半暝猶閣咧耍手機仔內底學英文的軟體。

有一工，伊本來跟我坐佇客廳，學英文的App仝款放送出來予逐家聽，伊綴咧唸，唸一睏仔了，伊紲家己徙入去房間內底唸。我佇邊仔是踮踮看我的電腦，嘛無出聲共吵到，伊是徙去內底創啥？敢講--有仝款耍這個軟體的網路朋友會使揣伊開講？伊才會覕入去內底，無想欲予人看到？

我是愈想愈懷疑，就行入去房間內底，看伊到底咧變啥魍？伊影到我行入去就隨共我喝聲，叫我莫共吵！我就是想欲看伊綴咧唸英文的App頂懸，是毋是有跟人咧開講無？規頭殼干焦想欲共創治的我，當然嘛繼續倚過去。結果，伊紲起呸面，真正起跤動手共我豁出去！

「攏是你害的啦！我欲考試過關，叫你莫來共吵，你閣硬欲過來！害我考無過！」原來，是我烏白想，鼻子摸咧，坐轉來客廳，看我的電腦。過一睏仔了，就看牽仔心情若像袂䆀ui房間走出來。「昨暝睏未去，就起來學英文，本來我攏無咧看排名，結果，昨暝耍一暗了紲變第一名！但睏一醒起來，我的排名就隨閣予本來是第一名的人拼過矣。這敢若咱咧做業務的時陣仝款，有人就是足重視第幾名的！」我心內想的是「阿妳毋是仝款跟人咧拼排名，無--干焦考試考無過，App無過關爾，就對我歹衝衝，閣起跤動手！」

想欲比別人較好，敢若是人的天性，因為咱每一個人會當出世，一定是查晡的二億隻精蟲，泅上緊得等的彼隻，跟查某的卵結合生出來的。但君子愛比人較好，嘛愛取之有道，袂使用偷食步。看到網路頂有人寫講，怹囝讀國中的時陣，竟然有人為著欲考到較好的成績，利用少年囡仔，愛有朋友做伴的感情義氣，全班鬥陣作弊。俗語講「細漢偷挽匏，大漢偷牽牛。」這些囝仔若無人共教，予怹知影做毋對代誌愛反省，無---驚大漢了，歹代誌會愈舞愈大齣！

想欲比別人較好的天性，是無分少年抑是食老。阿爸過身進前，我就有共問過「你今馬嘛無啥物代誌一定愛透早起來做的，哪得愛訂亂鐘仔叫你起床？」「我早起傳予恁看的彼的早安靜思語，逐工攏有人佇這個群組內底排名，你看，昨昏我是第二個傳的，今仔日我上早傳。」這個老人群組，會使用這款的排名，予行動已經無啥方便的阿爸成就感，來保持著伊佇生活中的趣味跟動力，咱嘛是愛共感恩才對。

既然想欲得等出頭天是咱的天性，按呢我就來唱一條歌，上早是第一等的伍百做予第一等的劉德華唱的台語歌「世界第一等」，祝福來遮聽我唸台語的逐家。