Co aumento das temperaturas chegan os incendios forestais, ainda que afortunadamente en pequena escala. O servizo de Emerxencias de Vilagarcía tivo que intervir esta mañá na extinción dun pequeno lume declarado na contorna do polígono de Bamio.

A corporación municipal de Sanxenxo aprobou hoxe en pleno o orzamento municipal para este ano, por valor de 41 millóns de euros. O documento contou coa abstención do BNG por considerar que as contas volven deixar fóra actuacións de gran calado e non contemplan grandes investimentos no rural.

Vilanova aprobará esta noite en pleno o informe de intervención sobre a liquidación da conta do exercicio de 2024. Cifras económicas que, segundo avanzaba o alcalde Gonzalo Durán, sitúan a Vilanova na mellor situación financeira dos últimos 50 anos.

A Xunta Local de Goberno de Vilagarcía aprobou hoxe as dúas primeiras actuacións do Plan Municipal de Asfaltados deste ano, na rúa Fontecarmoa e na travesía Rosalía de Castro, en Carril, cun investimento de 110.000 euros, financiados a través do Plan Máis Provincia.

O Concello de Vilagarcía procedeu hoxe á retirada do segundo piñeiro de gran porte ubicado no parque da praia Compostela que, ao igual que no primeiro caso, o goberno municipal decidiu talar debido ao seu estado.

Na Illa de Arousa, as obras de renovación das rúas Sor Aurora e Cruceiro rematan a primeira fase. A partir de hoxe queda aberta á circulación a Rúa Cruceiro e os traballos continuarán por tramos para non entorpecer as celebracións de Semana Santa.

Ribadumia iniciou a mellora dun tramo da rua Piñeirón, na parroquia de Leiro, que contempla a reonovación do firme e a solución dos problemas de drenaxe existentes.

Os centros de Educación Primaria comezan a recibir o milleiro de exemplares do conto “As mulleres do Mar” editado pola Concellería de Igualdade como parte do programa do 8M.

A Deputación de Pontevedra foi elexida finalista no International Tourism Film Festival Africa 2025 polo audiovisual da campaña Cando volves?.