မိတ်ဆွေတို့ရေ ဒီအပတ် ရယ်ရယ်မောမော ပေါ့ပေါ့ပါးပါး Podcast အစီအစဉ်မှာတော့ စိုင်းလျှန်းခမ်းရဲ့ ဘဝတူ မသန်စွမ်းသူတွေအပေါ် အသိပညာ၊ အတတ်ပညာ ဆည်းပူးလေ့လာထားဖို့ လိုအပ်ကြောင်းကို ကိုယ်တွေ့နဲ့ယှဉ်ပြီး ဝေမျှပေးမှုကို နားဆင်ရမှာဖြစ်ပါတယ်။

စိုင်းလျှန်းခမ်းဟာ သူငယ်နာအကြောတင်း လို့ခေါ်တဲ့ Cerebral Palsy (CP) မသန်စွမ်းမှုရှိနေသူ တစ်ဦးပါ။ အဓိကအားဖြင့် လူတစ်ယောက်ရဲ့ ကိုယ်နေဟန်ထား လှုပ်ရှားနိုင်မှုနဲ့ ဟန်ချက်ထိန်းနိုင်မှုကို ထိခိုက်စေပြီး များသောအားဖြင့် ကလေးဘဝမှာကတည်းက ခန္ဓာကိုယ်က ကြွက်သားတွေကို အသုံးပြုနိုင်ဖို့အတွက် ဦးနှောက်နဲ့ ချိတ်ဆက် အလုပ်လုပ်ဖို့ရာ အားနည်းစေပြီး သွားလာပြောဆိုရာမှာ အခက်အခဲရှိနေတဲ့ မသန်စွမ်းမှုလို့ အလွယ်တကူ မှတ်ယူနိုင်ပါတယ်။

Cerebral palsy (CP) is a group of disorders that affect a person's ability to move and maintain balance and posture. CP is the most common motor disability in childhood. Cerebral means having to do with the brain. Palsy means weakness or problems with using the muscles.

Transcript (စာသား)

"နံပါတ် ၄ ခေါင်းစဉ်အရ အတတ်ပညာ အသိပညာတွေကို ကြိုးစားလေ့လာ သင်ယူဆည်းပူးနေပါ။ ကဲ ဟုတ်ပြီ။ ကျွန်တော်တို့ မိတ်ဆွေ သူငယ်ချင်းကောင်းတွေ ရှိပြီ။ ပတ်ဝန်းကျင်ကောင်းတွေနဲ့လည်း သဟဇာတ ဖြစ်အောင် ပြုမူနေထိုင်တတ်ပြီ။ စာပေဗဟုသုတလည်း ရှာဖွေလေ့လာ ဖတ်ရှုတတ်ပြီဆိုတော့ ဒါဆိုရင် ကျွန်တော်တို့ လူတစ်လုံးသူတစ်လုံး လူရာဝင်နေပြီပေါ့နော်။ ဒါတင် မပြည့်စုံသေးပါဘူး။ ကျွန်တော်တို့ စံထားတဲ့ စံပြပုဂ္ဂိုလ် လေးစားအားကျတဲ့ ပုဂ္ဂိုလ်အတိုင်း ကျွန်တော်တို့ဘဝမှာ သူတို့လိုဖြစ် အောင် သူတို့လို အောင်မြင်ကျော်ကြားအောင် ကျွန်တော်တို့ စဉ်ဆက်မပြတ် အတတ်ပညာတွေ အသိပညာတွေ ထပ်ပြီးလေ့လာ သင်ယူရမှာဖြစ်တယ်။

ဥပမာ ကျနော်ဆိုပါစို့။ ကျွန်တော်က ကိုယ်အင်္ဂါမသန်စွမ်းသူ သူငယ်နာအကြောတင်း ဖြစ်တယ်။ ကျွန်တော်က ဘာအထောက်အကူမှ မပါဘဲ သွားလာလို့ရတယ်။ ဒါပေမယ့် သူများလို မြန်မြန်ဆန်ဆန် လမ်းမလျှောက်နိုင်ဘူး။ မပြေးနိုင်ဘူး။ အဲဒီတော့ ကျွန်တော်က ကွန်ပျူတာ ရိုက်နိုင်တယ်၊ဂီတာတီးနိုင်တယ်၊ ပြီးတော့ ကျွန်တော် ကိုယ်ကာယ လေ့ကျင့်ဖို့ လက်သမားပညာနဲ့ ခုံရှည်၊ ထိုင်ခုံ၊ အားကစား ကိရိယာတွေ ကိုယ့်ဟာကိုယ် လုပ်နိုင်တယ်။ ဒါသည် ကျွန်တော်လုပ်နိုင်တဲ့ တစ်စိတ်တစ်ပိုင်းပေါ့ဗျာ။

ကျွန်တော် ဆိုလိုချင်တာက ခြေမသန်ရင် လက်နဲ့ အလုပ်လုပ်မယ်၊ လက်မသန်ရင် ခြေနဲ့ အလုပ်လုပ်မယ်။ "အလုပ်ဟူသမျှ ဂုဏ်ရှိစွ" တဲ့။ လက်မသန်လို့ ခြေနဲ့ အလုပ်လုပ်တာ ကမ္ဘာပေါ်မှာ အများကြီးရှိတယ်။ မွေးရာပါ လက်မပါလို့ လက်မသန်လို့ ဆိုပြီး ဘာမှ စိတ်ဓာတ်ကျစရာ မလိုဘူး၊ စိတ်အားငယ်စရာလည်း မလိုဘူး၊ ကိုယ်လုပ်တဲ့အရာ ကိုယ်လုပ်နိုင်တယ်လို့ ယုံကြည်မှု အပြည့်အဝရှိတဲ့ အရာကို မဆုတ်မနစ်တဲ့ ဇွဲ၊ လုံ့လရှိရှိနဲ့ ဘယ်တော့မှ နောက်မဆုတ် အရှုံးမပေးနိုင်တဲ့စိတ်နဲ့ ကြိုးစားနေဖို့ပဲ လိုပါတယ်။

အခုခေတ်မှာ နည်းပညာခေတ် အွန်လိုင်းပေါ်မှာ အသိပညာတွေ အတတ်ပညာတွေ လေ့လာသင်ယူလို့ ရပါတယ်။ အဓိက လက်ကိုင်ဖုန်းကို ကောင်းကောင်း သုံးတတ်ဖို့ရယ်၊ အင်္ဂလိပ်စာဖြစ်စေ၊ တရုတ်စာဖြစ်စေ၊ ကိုယ် ကြိုက်တဲ့ ကိုယ်တတ်တဲ့ ဘာသာစကား Language မဆို ကျွမ်းကျွမ်းကျင်ကျင် တတ်မြောက်ဖို့ရယ်၊ ဒါဆို ကိုယ့်ဖာသာကိုယ် လေ့လာသင်ယူလို့ ရပြီ။ ဒါပေမယ့် အွန်လိုင်းပေါ်မှာ အသိပညာ အတတ်ပညာ သင်ယူဖို့ မတတ်နိုင်သည်ဖြစ်စေ၊ ဘာသာစာစကား Language မတတ်လို့ ကိုယ်ဖာသာကိုယ် မလေ့လာ မသင်ယူ နိုင်လို့ဖြစ်စေ၊ ဘာမှ စိတ်ဓာတ်ကျဖို့ မလိုဘူး၊ အရှုံးပေး စရာလည်း မလိုဘူး။ ရန်ကုန်မှာ လူမှုဝန်ထမ်းဦးစီးဌာန မသန်စွမ်း သက်ကြီးသင်တန်းကျောင်းမှာ အခမဲ့ အတတ်ပညာတွေ သင်ကြားပေးနေပါတယ်။ ၂၀၁၂ ခုနှစ်မှာ ကျွန်တော်ကိုယ်တိုင် ကွန်ပျူတာသင်တန်းကို ၃ လနဲ့ သွားရောက် သင်ယူခဲ့ပြီးပါပြီ။ နောက်ထပ် အခမဲ့ အတတ်ပညာတွေ တတ်ယူနိုင်ဖို့အတွက် ရန်ကုန်မှာ တစ်ခြားကျောင်းတွေလည်း ရှိသေးပါတယ်။

တကယ်လို့ ဖြစ်နိုင်ရင် တတ်နိုင်ရင် ကျွန်တော်တို့ မသန်စွမ်းသူတွေကို မည်သည့် ဘာသာစကား Language မဆို လေ့လာသင်ယူ ဆည်းပူးစေချင်ပါတယ်။ ဘာဖြစ်လို့လဲဆိုတော့ အခုခေတ်က IT Information Technology ခေတ်ဆိုတော့ ဘာသာစကား Language သာ ကျွမ်းကျွမ်းကျင်ကျင် တတ်မြောက်ထားမယ်ဆိုရင် ကျွန်တော်တို့ မသန်စွမ်းသူတွေ မျှော်မှန်းထားတဲ့ ဘဝအဆင့်အတန်း၊ အဆင့်မြင့်တဲ့ အောင်မြင်ကျော်ကြားတဲ့ ဘဝပန်းတိုင်ကို ရရှိလာအောင် လုပ်ဆောင်နိုင်မှာ ဖြစ်တယ်။ အခုနက အပေါ်မှာ ပြောခဲ့တဲ့ စံပြပုဂ္ဂိုလ် လေးစားအားကျတဲ့ ပုဂ္ဂိုလ်တွေလို ဖြစ်ချင်တယ်ဆို ဘာသာစကား Language ကျွမ်းကျွမ်းကျင်ကျင် တတ်ထားမှ သူတို့က ဘာတွေလုပ်နိုင်တယ်။ သူတို့က ဘယ်လိုစိတ်နေ သဘောထား ထားတာလဲ၊ သူတို့ရဲ့ နည်းလမ်းကျင့်စဉ် တွေက ဘာတွေလဲဆိုတာ လေ့လာသင်ယူ ဆည်းပူး အတုယူနိုင်မယ်လေ။

ဒါက ကျွန်တော်ရဲ့ Personal အမြင် ခံယူချက်ပါ။ ကျွန်တော် ဘာသာစကား Language ကို အစဉ်တစ်စိုက် အထူး နှစ်သက်လေ့လာ သင်ယူဆည်းပူးနေသူပါ။ ဒါပေမယ့် တစ်ယောက်နဲ့တစ်ယောက် အမြင်တွေခံယူချက်တွေ တူချင်တူမှ တူမယ်လေ။ လက်ခံချင်မှ လက်ခံမယ်လေ။ ကျွန်တော်ကတော့ ကျွန်တော့်အမြင် အယူအဆတွေကို လက်ခံပေးပါလို့၊ ကြိုက်နှစ်သက်ပေးပါလို့ မဆိုလိုပါဘူး။ မတောင်းဆိုပါဘူး ခင်ဗျာ။"

"ရယ်ရယ်မောမော ပေါ့ပေါ့ပါးပါး" Podcast

https://anchor.fm/mcanetwork

https://myanmarcinemabilitynetwork.wordpress.com/

https://www.clubhouse.com/club/myanmar-cinemability-network

https://www.youtube.com/@mcanetwork

https://t.me/mcanetwork

https://twitter.com/MCinemAbilityN

https://www.instagram.com/myanmarcinemabilitynetwork/

https://www.linkedin.com/company/mcanetwork/

https://www.clubhouse.com/club/ရယရယမမ-ပပပပ

Gmail: [email protected]

09261256493, 09420819597, 099450067352

#SkillAndKnowledge

#ForeignLanguage

#InformationTechnology

#PeerToPeerMotivation

#PodcasterWithDisability

#DisabilityAndCreation

#InclusiveIndependentPodcast