【詩名】：抱著咱的夢

【作者】：黃勁連

【詩文】：

抱著一个夢

毋驚風冷霜凍

咱的祖先

拚過烏水溝

拚過毋知名的漁港

拚過闊莽莽的大海

㧣風搢水、駛孤帆

抱著一个夢

咱的島嶼

抱著祖先的夢

婆娑的海洋

抱著祖先的夢

珊瑚的海洋

月光照落的山河

抱著祖先的夢

每一个漁港

每一隻船的出帆

有祖先的夢

咱的土地有夢

咱的溪水有夢

咱的田園有夢

有祖先的夢

抱著一个夢

毋免心沉重

不管做佗項

不管擔菜抑賣蔥

不管作穡抑做工

努力來拍拚

一定有希望

毋免驚天暗

毋免驚雨水

潑入窗 出外的

心情放予輕鬆

不管是頂港下港

台灣頭台灣尾

逐家攏有向望

抱著咱的夢

有一工有一工

一定毋是眠夢

春花開出咱的美夢

咱會完成祖先的心願

完成祖先的夢

註：台語文用字尊重作者原創，不做更動，如有疑問請查詢教育部《臺灣閩南語常用詞辭典》網站。