– Hetta er ein rættiliga ymislig framsýning. Mær dámar best, tá ið fólk fáa ymiskt at síggja, tá tey koma á framsýning, og at allir málningarnir ikki líkjast.

Bárður Jákupsson er í stórformi, nú hann sýnir fram á tveimum støðum í Havn í senn í hesum døgum. Seinastu 16 árini, síðan hann fór frá sum stjóri á Listasavni Føroya, hevur hann málað burturav, og hann hevur ongantíð verið meira virkin enn tað sama.

– Eg kann næstan iðra meg um, at eg ikki gjørdi tað fyrr, sigur Bárður.