Í Rokklandi í dag förum við á tónleika með Pink Floyd í Knebworth á Englandi árið 1990, sögufræga tónleika sem Pink Floyd var aðalnúmerið á, en hinir sem spiluðu voru Paul McCartney, Genesis, Phil Collins, Robert Plant og Jimmy Page, Dire Straits, Eric Clapton og Tears for Fears. Allir sem spiluðu gerðu það frítt, tónleikagestir voru ca. 120.000 talsins og það var verið að safna peningum til að setja á laggirnar Brit listaskólann sem var svo opnaður í Croydon í London 1991. Við heyrum nýja músík með fólki eins og Moby, Sturgil Simpson, King of Convenience, Nancy Wilson og fleirum, en byrjum á Bob Dylan sem verður áttræður 24. Maí. Maíhefti tónlistarblaðsins Uncut er tileinkað Bob. Þar er stór og mikil grein um hann þar sem haugur af fólki er m.a. að tjá sig um kynni sín af meistaranum, fólk eins og Paul McCartney, Robbie Robertson, Jackson Browne, Jeff Tweedy, Van Morrison, Graham Nash, Elton John, Roger Daltrey og margir fleiri. Blaðinu fylgir svo diskur með músík eftir Dylan sem er flutt af hinum og þessum sem Uncut bað um að taka upp sérstaklega fyrir þetta blað. Þetta eru listamenn eins og Flaming Lips, Richard Thompson, The Weather Station, Cowboy Junkies, Low og fleiri - og við ætlum að heyra nokkur þeirra í þættinum.