بوسة بلون الشمس

صمتِك بوسة بلون الشمس اللي بترويني

صوتِك حضن بيمحي البرد اللي ف شراييني

بألقى الناس ف عينيكي ملايكة

قلبي يصالح فيكي جراحه

حتى الكون اللي مطوقني بأسلاك شايكة

فجأة بأحس بطعم براحه

لما ف وسط الزحمة بأقابلك و تضميني

كل ما تبقى النظرات حادة

بألقى الحضن بيطول أكتر

بألقى الشوق ف عينيكي اتحدى

رفض الخَلق اللي بتتوتر

من حضننا و كأنه جريمة

فجأة بأحس بعربياتهم

ممتلكاتهم مالهاش قيمة

فجأة بأحس بإن نجاحهم

مهما اتفاخروا ف آخره هزيمة

فجأة بأحس بإني خلاص

مابقتش فقير

وإني مجرد ما انطق اسمك

هأبقى باطير

وإني برغم ديوني وضعفي

وعمري الشارد

بأقدر أواجه كل مخاوفي

بصرخة مارد

بس لإنك بتحبيني

وأما ف وسط الزحمة بأقابلك بتضميني

---------------------------------------

كلمات والحان : انطونيوس نبيل

توزيع : وليد ميمني