我是出世佇一個查晡人較濟查某人的家庭。阮阿母生四個查晡囡仔，我排第三個。讀冊的時陣，讀仝班的嘛是較濟攏是查晡囡仔，因為國中高中讀的是人講的和尚學校，大學讀電子，阮彼班全部攏是班草，干焦有一蕊班花爾。

毋過出社會了，紲入去一個看起來是查某人較濟查晡人的行業，佇阮辦公室內底是按呢，我無去揣正式的統計數字。拄來做保險不偌久，有跟同事前輩鬥陣去拜訪新竹的一間公司，彼工拄好怹的人事處長咧教員工按怎看面相，拜訪煞無代誌，阮規陣人就去坐咧邊仔聽。

處長看著阮中途入去，伊拄好想欲展一下仔伊看人誠準的工夫，就叫我出去做model。我的面有一粒痣誠明顯，是佇咧正蕊目睭跟耳仔中央，較倚目尾的所在。處長看了就講，我的生活中，查某人緣應該袂䆀，有可能是厝內底抑是辦公室，較濟跟我接觸的人是查某囡仔，我共講伊有臆對一半一半。伊繼續講，佇讀冊的時陣抑是佇公司來底，敢無有查某囡仔主動送過早頓予我？呵呵！若有遮爾好空的代誌，我就袂聽候到重考大學的時陣，才敢跟查某囡仔講話。讀冊是讀和尚學校，哪有這款機會！上班了閣是跟阮某仝台車仝公司仝辦公室，除了阮某，猶有誰會提早頓予我吃？

我共處長講，這粒痣是我讀大學的時陣才生出來的，細漢的時陣無印象有這粒痣。按呢看起來，其實處長臆了嘛有準。有可能是痣生出來了，我熟識阮某，阮某大學是讀全部攏查某囡仔的學校，我去參加伊的活動，伊的同學攏是查某囡仔。我是結婚了才綴阮某來做保險，雖然同事嘛是查某囡仔較濟，但不管我有偌好的查某人緣，應該無人有興趣送我早頓才對。

雖然生活中毋捌拄過有查某囡仔送我早頓過，但可能嘛有像處長所講的查某人緣袂䆀的關係，若有人拄到男女感情問題，想欲聽過來人的意見跟建議的時陣，有些同學朋友會想到我，願意跟我講出喙，較濟是查某囡仔。有當時仔是我感覺到，敢若有佗位怪怪，主動提醒已經結婚的查某同事，這個人客是毋是誤會咱猶未嫁娶？提醒怹愛共人講予清楚，按呢咱跟客戶的關係才會平順久長。

頂個月有跟一個朋友開講，伊兩個囡仔攏猶未讀小學，聽伊講怹翁仔某最近冤到真厲害，伊毋知影欲按怎做，才會使解開今馬這個死結。這個朋友是一個緣投仔桑，工作認真業績誠讚，若照我所知影的印象看起來，伊嘛是一個查某人緣袂䆀的少年阿爸。俗語講，一人煩惱一項，無人煩惱相仝；閣較好的查某人緣，拄到頂世人相欠債的，這世人嘛愛修來還。其實，無一對翁仔某代毋捌冤家過，我嘛無啥物特別較好的建議會使予伊。

我干焦共講，咱若行入婚姻，就一定愛有「歡喜做甘願受」的覺悟。囡仔是咱欲生的，某是咱欲娶的，若啥物代誌攏愛咱做，咱嘛愛歡喜甘願。咱家己一個人蹛，愛趁錢煮食洗衫擦塗跤；跟規家伙仔蹛，嘛是愛趁錢煮食洗衫擦塗跤，就是加幾塊碗筷，幾領衫褲爾，咱敢有差？向望對方為咱改變，規氣咱家己來改較快。

上尾，我改一句俗語送予伊，因為這件代誌干焦會使伊家己想，我無法度講予知，雖然電視電影會搬出來予人看，但實際上是人足私密的一件代誌。這是人的生理需求之一，跟忝就想欲睏，枵就想欲食物件仝款，跟人攏會喘氣啉水仝款自然。「假使講恁某感覺你對伊攏無溫柔，囝恁嘛生過兩個矣，做這件代誌一定是恁互相對待上蓋溫柔的時陣。人講翁仔某是床頭吵床尾和，共床尾的床改做交字，你就知影我咧講啥。」