Tá ar a laghad billiún béile de bhia inite á gcur amú gach lá i dteaghlaigh ar fud an domhain. Is leor sin chun béile amháin in aghaidh an lae a chur ar fáil do gach duine aonair atá thíos leis an ocras ar fud an domhain. Nuair a chaithimid bia amach, cuirtear an fuinneamh agus na hacmhainní ar fad a úsáideadh chun é a réiteach amú freisin. Mar sin, imrítear tionchar ar an gcomhshaol, mar shampla astaíochtaí gás ceaptha teasa, ach ní chuireann an bia cothú ar fáil do dhuine ar bith. Dá bhrí sin, tá sé mar aidhm le beartais bainistithe dramhaíola an Aontais an tionchar atá ag cur amú bia ar an gcomhshaol agus ar an tsláinte a laghdú.