讀書會最近讀的冊叫「生命最後三通電話你會敲予誰？」。作者郭憲鴻，外號小冬瓜，是一位自細漢就綴著佇黑道的老爸（外號冬瓜）四界走路，後來怹老爸投入殯葬業，他嘛自細漢就綴怹老爸參與殯葬事務。年紀雖輕，但已經看過誠濟人間告別的過程。雖然冊名是這按呢問，毋過作者並毋是寫一本冊來回答這個問題，而是用家己參與過，一個閣一個的告別故事，以書寫文字來解鬱家己跟已經過往老爸之間的愛恨交纏。

一看到冊名，我第一個想法是「就已經是生命最後矣，我應該袂猶閣想著欲敲電話吧？」然後是「若一定愛敲，真正毋知欲敲予誰？」「毋知佇生命最後，有人是想欲敲電話予我無？」「毋知佇我生命最後，有偌濟人想欲敲電話予我？」「免到三通吧？現在用line群組會使誠濟人鬥陣講，一通就會使。」心內底開始有練喙花的劇情走出來。冊看煞了，就是我第一個想法爾，因為冊名與內容無啥關係。作者除了回想怹爸囝關係之外，就是用故事來提醒世人如何看待死亡，談論死亡跟準備死亡。

死亡佇誠濟人的觀念內底，尤其是咱上一緣的長輩，是禁忌話題。阮丈姆的體質特殊，誠容易對死者有感應，日常生活中攏真小心閃避，牽仔是佇這種環境大漢，自然會受到影響。頂禮拜六阮兜附近的社區有人跳樓，一樓是我們定定會去食的烏龍麵店。牽仔知影了後就暫時無欲去食麵，嘛無愛ui店面頭前行過。我聽鄰長講人無死，命有救轉來，但牽仔猶是堅持先莫行，等過一陣子再講。

我這爿的家庭對死亡，敢若就無遐忌剋，老菩蕯退休了長期佇法鼓山做志工，一直到他行動無方便才無去。有當時仔跟序細佇厝裡開講的時陣，會講到法鼓山的樹葬誠好，將來伊樹葬就好，嘛有講過無愛插管、電擊...等等ＤＮＲ的選擇，後來伊跟母親攏有簽署慈濟病院的預立醫療同意書。

有一遍，我讚同老菩蕯的ＤＮＲ選擇，跟在場的親友講，若我發生昏迷狀況，千萬毋通送我去病院！彼時陣大嫂用嚴肅的口氣跟我提醒講：按呢怹是犯遺棄罪喔！後來大嫂經歷照顧她小兄得癌愛氣切的過程，怹小兄猶清醒時，共大嫂講這些強制醫療予伊足痛苦矣，後來大嫂才改變伊一定愛送病院的觀點。今年三月老菩蕯開始睏毋知人，佇伊身軀邊陪伴的我，干焦佇家庭群組內底講予逐家知，並無送病院，大嫂今馬的感覺是，我的做法予伊誠安心。

佇冊友分享心得的過程中，有人講伊第一遍佇暗時顧靈堂的時陣是會驚的。我想無的是，明明知影過身的人，是對咱誠疼愛的阿公阿媽，但聽到靈堂附近有貓咧叫，猶是會驚若貓跳過棺柴，大體會跳起來的都市傳說！不知這種驚惶的感受，是天生如此？還是後天學得的？我會記持十幾年前，查某囝猶細漢，第一改看到倒佇棺木中，雲林阿祖的大體，並無驚惶的感覺（ https://bit.ly/4gdDsGV ）。較大漢了去參加嘉義阿祖告別式的時陣，猶用她的單眼相機，翕阿祖倒佇棺木中的面容。

作者講死亡是咱人上尾的孤逝旅行，好好道別，生死兩相安。有書友講，除了學作者準備伊所講的孤逝行李箱之外，最近嘛拄好跟囝兒序細咧修復親子關係，因為過去無張持的話語行為，紲予手足之間產生不公平的感受，咱家己攏毋知，一直到最近爆發親子衝突才發現到，佳哉讀書會讀過的冊，予伊知影按怎跟序細好好的講，希望未來道別的時陣，會當無留任何的遺憾。

我對「手足之間是毋是會比較父母對待的公平性」跟「是毋是會驚亡靈」仝款，到底是先天個性如此？抑是受後天環境影響較大？一對家中有兩個囝兒的翁仔某退休了，大囝除了送這對翁仔某去歐洲旅遊，猶閣買一台百萬新車予怹駛。我聽了干焦感覺這個大囝誠讚呀！但牽仔聽了卻問我「怹的細漢囝會感覺壓力誠大無？」果然是一樣米飼百樣人。

佇我陪伴老菩蕯的最後時間裡，他捌講到斷食善終誠好，因此佇伊開始睏到叫毋知人，有時仔有意識才有回應的狀態時，除了問伊欲啉水無，幫他定時用滴管滴水予啉，嘛有問他欲食物件無？他是有出聲確定講：莫啦！其它較濟的時陣，阮就是佇伊耳空邊叫伊放心，囝孫仔攏過得誠好，伊佇這世做了誠讚！是友孝的囝兒，負責的翁婿，公平的老爸，慈愛的阿公，與助人不求回報的貴人朋友，予伊知影他無留下任何的遺憾。

作家蔡詩萍捌佇伊的冊中寫到，彼當時伊受傷，怹老爸偝伊走去揣醫生，伊趴佇怹爸的尻脊骿，才有怹爸囝身體接觸的記持。我想這應該是咱這代人共同的模樣，我跟老菩蕯嘛無什麼身體接觸的記持，一直到我陪伴他的這段時間，他無法度家己自理伊的日常生活，愛有人來共幫忙協助，甚至是最後意識開始無清楚，幫他換衫褲擦身軀，攏愛予伊坐起來，尻脊骿倚佇我身上才好處理。只是這時陣的肌膚之親，留予咱的已經毋是歡樂、感動的記持，而是即將道別的感慨矣。