O presidente e o vicepresidente do Concello de Cerdedo-Cotobade, Jorge Cubela e José Balseiros, compareceron hoxe en rolda de prensa, celebrada no hotel Rías Bajas de Pontevedra, para informar do seu ofrecemento á empresa Energía y Celulosa (ENCE) para que estude a viabilidade de implantar a súa planta de producción enerxética a partir de biomasa forestal no seu territorio, concretamente na área industrial de Folgoso. Os dous representantes municipais, ante as informacións aparecidas nos medios de comunicación de que a pasteira prioriza o proxecto de Huelva e adia o de Lourizán por cuestións de índole administrativa, informaron que acaban de remitir unha carta á empresa explicando a súa proposta.