:قال ضيفنا

 الصراحة مكنتش بغيت نتكلم على هاد الموضوع لانه الوقت فاش رجعت للمغرب 1فبراير كان هاد الفيروس مجرد إشاعة او نكتة طريفة عند أغلبية الناس و كنت اكثر من ذلك كنتمنى انه ميوصلش المغرب و اتوقف في الصين و لكن الأمور دابا مختلفة و كنحس بنوع من المسؤولية فإنني نشارك تجربتي القصيرة ممكن تكون فيها افادة او متكونش. انا دوزت تقريبا 9 اشهر في الصين بحكم انه كانت اول مرة في الصين مكنتش عارف انه عطلة رأس السنة الصينية ( هاد عام كيحتفلو بعام الفأر....) هي واحد العطلة كبيرة و ليفيها كتوقف الحركة كليا و أغلبية الأجانب او الصينين الميسورين كيسافرو خارج البلد (بحال عيد الاضحى نوعا ما)( و انا بقيت متردد في السفر لدرجة أنه أغلبية الرحلات الخارجية أو الداخلية تقادات او ثمنها تضاعف خاصة الجوية فلقيت نفسي معزول في المدينة لي انا فيها. لان اغلب المطاعم و محلات الأنشطة مغلقة لمدة شهر يعني مكاين ميدار .. و بقيت تقريبا اسبوعين منحسر ما بين الدار و شي مطعم من مطاعم الأجانب المفتوحة و فقط. ..فنفس الوقت كانت تتوصلني اخبار على فيروس و وهان ولكن متلي متل بقية الناس كتجيني ووهان بعيدة ب 900 كم يعني مكاينش مشكل …