這篇是2020年6月26的面冊貼文

毋知對當時開始，我聽著一個評論講法時，攏會先用另外一爿的看法來思辨一下。有人講這是無家己的主張，無中心思想，牆頭草，西瓜像欲偎大爿；嘛有人講，無急咧評論別人是自我修養的開始，緊事寬辦，事緩則圓。人嘛，攏是揀好的來聽，講按呢是有修養的人較合我的意。

有一天，學弟貼一篇探討雙連市場改建的文章予我，乘紲批評政府官員真濟人攏是發展主義，就是愛發展經濟，越起越濟，起予人翕相打卡買物件，老攤商佇遐歹看，就用消防安全的理由共怹趕走，無咧睬這些老人是毋是生活過袂落去。

我知影有一寡舊市場的改建案，會使拖一二十冬，不知是官員傷憨瞞，抑是代誌傷大條，其中必有緣故。但是這個緣故，是不是就是咱所看到的表面，抑是跟我頂一篇講的同款，有一寡重要的隱變量，才是左右全局的關鍵，卻藏佇咱無注意的所在。

政府的發展主義若傷超過，對人民應該是䆀處較濟好處，上驚是無文化做地基，只要是舊的老的就拆了了，對政府來講按呢上緊，因為保留維護老物件，其實是比新起閣較開錢、傷腦筋。

但是不是干焦政府才有發展主義？彼工阮讀冊會一陣人去三峽老街行讀，當初欲保留老街的時陣，反對上厲害的是當地的住民，佳哉彼時陣的蘇縣長替住民揣一條錢予政府出，才有今仔日的老街。所以，毋但政府愛起爾，若免出錢就有新的通住通用通踅，誰人無愛？

我干焦講頂懸三峽老街彼段予學弟看，伊就趕緊回一篇閣較長的看法予我。其實，阮兩人的觀點差無偌濟，我是紲手貼別種看法爾，毋是跟伊徛無同爿。伊嘛知影，所以上尾伊就學孟子講「著是愛辯，你豈好辯？你不得已爾。」就是欲諍到贏爾爾啦！