上班附近的捷運站，有跟兩間百貨公司的B2美食街連做伙，較遠彼間的出入，跟地下街的路有隔一個自動門；較近的這間無，捷運站出來，就直接是B2的商場、美食街。近的這間百貨的大門，是佇咧怹家己的B1。

中晝時食飯，我會行去較遠彼間食素，行的路線是先對近的這間的B1大門入去，落去B2了，才按B2的地下街路行過去。

這擺咱台灣的防疫成績做了有媠氣，是予世界各國呵咾有著的。雖然佇國內新著病毒的人，一工比一工較少，但是各級政府要求公共場所的防疫措施紲愈來愈嚴，毋知是真正做有效的？抑是干焦欲做予人看的？至少有人著病時，有做就較免擔責任；亦或是輸人毋輸陣，輸陣歹看面，硬欲做贏人的面子問題？我是看攏無。

自從政府規定坐捷運的人攏愛掛喙罨了，這兩間百貨公司嘛有加做一寡代誌來配合政策。兩間有淡薄仔差別，我定定佇這行來行去，推想兩間公司加做這些防疫措施的心理，嘛感覺真心適。

近的這間，因為人客自B1大門出入較少，所以伊干焦加倩一個人徛大門，幫欲入去的人客量頭殼額的溫度，無咧插人客有掛喙罨無，對我來說較方便。B2美食街較濟攏是直接對捷運站出來的人，伊應該當作政府佇捷運站攏有做矣，伊就省起來。伊較工夫的所在，是佇美食街的桌頂，有加囥一塊透明的塑膠板，佮坐相對面的兩人隔開。因為人客食物件的時陣無掛喙罨，坐同桌的社交距離無合規定，但坐相隔壁的就無隔，可能無面對面，喙瀾較袂相噴。

我欲去食的素食佇遠的彼間，怹的地下街自動門這出入的人較多，伊就毋但加倩一個人爾，閣加囥一台紅外線的機器，人行過就知影有發燒無，而且看人客沒掛喙罨時，加倩的彼個人會佮你閘落來提醒，講是政府叫人愛掛。我去予人閘兩遍了，就乖乖佇門口前，掛好喙罨才行入去，入去了就提掉，收起來囥橐袋仔。雖然伊比近的這間有加叫人客掛喙罨，但是伊的美食街就無像近的這間遐工夫，桌頂並無加栽塑膠板。我咧臆，頭家一定想講，食物件閣欲維持社交距離，做佮夠傷傷本，做一半規氣莫做。門口做予人看有就好，入來內底的人客伊就管袂著矣。