這篇是共2020年4月11號的面冊貼文改寫做台文

因為跟大尾CEO佇便所內相拄著，一句「你嘛來旋尿喔」的相借問，予我想起佇彼咧時代攏無啥咧講台語的讀冊囡仔，予國文老師一教就記到旦的「旋」字。假使咱若會使順這條線索落去揣台語字，有可能會使發覺到，有一寡講法、發音，是今馬的中語誠少用到的字，但佇台語內底紲定定聽到，閣真有古早人的氣口。若是閣有朋友，有真大的誤解，認為台語是有聲無字的話，按呢看會使用這個角度來看無？其實台語是有字的，是咱猶毋捌學過爾。

上頭先予我想到的是，前年跟同事鬥陣讀候文詠寫的「沒有神的所在─私房閱讀《金瓶梅》」這本冊。侯文詠佇伊的冊中，𤆬咱遮咧看伊這本冊的人，欲按怎來看金瓶梅咧寫啥物的時陣，攏會先紹介金瓶梅內底原本所寫的文句，嘛會對文句內底一寡今馬較少看到的字做解釋，彼時陣，鬥陣讀冊的同事對「踅」這字就有誠深的印象。

《金瓶梅》第二回：「這婆子正開門，在茶局子裡整理茶鍋，張見西門慶『踅』過幾遍。」。遮內底的踅字，是來回行的意思，原文按呢寫，予人若像佇現場看到西門慶，來來去去經過王婆店的門口前幾偌逝，就是一付流規甲喙角全是豬哥瀾，規工咧肖想潘金蓮的模樣。揣網路頂的字典，才發覺到毋旦金瓶梅爾，咱攏捌聽過的古早冊，西廂記、水滸傳、老殘遊記遮的冊內底，嘛攏有用到踅這字，完全跟台語用的意思一模一樣，反倒轉是今馬的中語內底，紲變成咱誠少看到的生份字。

其實中語講的「逛街、逛夜市」，台語就是講踅街、踅夜市，「四處逛逛」的台語是四界踅踅。中語的生份字紲佇台語定定用到，這予遐的會曉聽抑是會曉講台語的同事聽了，紲有「到旦你才知」的感覺。

對踅街踅夜市閣予我想到另外一個台語嘛定定會講到的字叫做「趖」，線頂的中語字典已經揣無這字矣，表示這字真正生份到袂使，現代中語已經無人咧用，但是唐朝的詩有人寫老人佇日頭落山的花叢內，沓沓仔散步的詩句，就有用到這字，「豆蔻花間『趖』晚日」。

台語內底有用趖字來講蛇的行動，另外嘛是有沓沓仔徙動的意思。後來變成提來講人的跤手無扭掠、動作慢，譬如講：伊做代誌真勥趖；抑是沒共講欲創啥，惦惦仔做，無出聲的行為，譬如講：你是趖去佗位？今馬猶閣看會到這字予人寫出來的所在，應該是佇夜市仔內底，咧賣喙食物的點心擔「鼎邊『趖』」矣。

「鼎邊趖」是一種用米做的料理，伊是用一坩大鼎中央貯水，共水煮予滾了，共在來米絞做粉挨予幼，透水抐做米粉糊，才順著燒盪盪的鼎邊，箍一輾共倒落去，鼎蓋崁起來，予滾水的燒氣慢慢仔炊熟，做出白幼閣帶軟𩚨的米粉皮。除了會使對現代中語字典內底揣無「趖」這字，看出這點心名不是用中語發音之外，「鼎邊趖」內底的「鼎」字，嘛是台語自古用到今馬的生活用字。

「鼎」是古早人用來煮食的家私，腹肚圓圓、三跤兩耳，嘛有四跤的四角鼎，較濟是用佇商朝、周朝的時代。但是今馬中語講的，用來煮食的家私較濟攏叫做鍋，反倒轉台語到旦嘛猶閣叫「鼎」，廚房除了叫灶跤以外，嘛有叫鼎間的。

煮食的家私叫古早名，煮好的物件，台語嘛仝款有保留誠重的古早味，譬如咱定定食的早頓，中語叫「粥」，台語叫「糜」，查了線頂的中語字典，你會發覺到「糜」字較濟出現佇古早人的文章內底。相信逐家攏捌聽過歷史上晉惠帝問過的一句話：「何不食肉糜？」。因為災禍連連，足濟老百姓攏枵死佇街頭路邊的時陣，毋知人間病苦的皇帝，紲咧問伊身軀邊的大臣講，怹遐的老百姓腹肚枵，那會袂曉去煮肉糜食？