有一日，住喺草原東邊嘅袋鼠東東同埋住喺草原西邊嘅袋鼠西西，佢哋都喺練習點樣先可以跳得又高又遠又充滿力量，佢哋好專心地練習，跳下跳下跳下跳 不知不覺就跳到對方面前。佢哋好開心發現對方同自己一樣將練習緊點樣跳得更好？，就決定一齊練習。袋鼠東東跳得遠啲，而袋鼠西西跳得高啲。有咗互相嘅陪伴，練習都變得更有意思，佢哋好快就成為朋友啦。

烏鴉喺天上見到佢哋就會唱：

「兩隻袋鼠跳跳跳

你追我跳笑笑笑

兩隻袋鼠跳跳跳

好朋友齊來笑笑笑」

袋鼠東東同袋鼠西西成為每日一齊玩嘅好朋友。有時候東東追西西，有時候西西追東東。佢哋渴嘅時候就去河度飲水，肚餓嘅時候就搵嘢食，攰嘅時候就喺草地度休息。每日喺草原度跳來跳去，玩得好開心。

不過有一日，烏鴉就唱道：

「兩隻袋鼠跳跳跳

嬉笑變成怒罵了

兩隻袋鼠跳跳跳

好朋友為何打鬥了？」

原來呢一日，當袋鼠東東去搵袋鼠西西玩嘅時候，見到袋鼠西西喺掘住晚上要訓覺的竇。見到佢好努力咁掘，掘啊掘，袋鼠東東就忍唔住想整蠱西西。佢靜靜雞咁嚟到袋鼠西西嘅附近，然後奮力一跳，結果唔單止嚇親袋鼠西西 令到佢跌倒，仲唔小心整爛咗佢辛苦挖的竇。袋鼠西西又嬲又傷心，嬲到忍唔住要打袋鼠東東，袋鼠東東忍唔住又還手，兩隻袋鼠就咁拳打腳踢打交啦！最後佢哋兩隻袋鼠都打到口腫面腫又嬲爆爆各自返屋企。

過咗幾日，袋鼠東東同袋鼠西西都嬲完啦，佢哋又一齊玩一齊跳，跳去一棵樹下準備休息時，發現樹上有一粒又紅又大嘅蘋果。佢哋兩隻好努力跳，跳啊跳，都想要呢顆又紅又香嘅蘋果。袋鼠東東努力跳啊跳，跳啊跳，但就係唔夠高。袋鼠西西努力跳啊跳，跳啊跳，最後一跳，佢成功咬咗蘋果落嚟，不過都唔小心咬咗一大啖。袋鼠東東好難過，以為袋鼠西西故意唔俾佢蘋果食，見到袋鼠西西食咗好味嘅蘋果，袋鼠東東又嬲又傷心，嬲到忍唔住要打袋鼠西西，袋鼠西西忍唔住又還手，兩隻袋鼠就咁拳打腳踢打交啦！最後佢哋兩隻袋鼠都打到口腫面腫又嬲爆爆各自返屋企。

呢個時後烏鴉見到就唱：

「兩隻袋鼠跳跳跳

嬉笑變成怒罵了

兩隻袋鼠跳跳跳

好朋友為何打鬥了」

過咗幾日，袋鼠東東同袋鼠西西都嬲完啦，佢哋又一齊玩一齊跳，一齊跳到河度飲水嘅時候，佢哋望住水中嘅倒影，袋鼠東東問：『西西你覺得我哋邊個係哥哥邊個係細佬呀？我跳得遠，我應該係哥哥啩？』西西話：『我跳得高，我應該係哥哥啩？』佢哋兩個都爭住做哥哥，兩個都好嬲兩個都唔想放手，咁就再一次拳打腳踢打交啦！最後佢哋兩隻袋鼠都打到口腫面腫又嬲爆爆咁各自返屋企。

呢時烏鴉又出嚟唱：『

兩隻袋鼠跳跳跳

嬉笑變成怒罵了

兩隻袋鼠跳跳跳

好朋友為何打鬥了？』

過咗幾日，袋鼠東東同袋鼠西西都嬲完啦，佢哋準備一齊去玩嘅時候，聽到烏鴉叫：「大件事啦，大件事啦水浸啦 水浸啦」。天空忽然狂風暴雨，原來係暴風雨嚟緊。突如其來嘅大雨令到河水迅速漲滿晒，浸咗成個草原。所有草原上的動物哋荒失失咁唔知點算，袋鼠東東同西西決定出面，引導大家前往高地，等待氾濫的河水退去。袋鼠西西跳得高，佢喺隊伍前面跳，睇下前面有冇路，袋鼠東東跳得遠，佢帶領小動物比平時更快嘅速度行去高地。有袋鼠東東同袋鼠西西嘅引導，動物哋都平安地到達高地。

所有動物都安靜地等，等啊等 直到雨停咗，雲散咗，陽光再次照耀住大地，天空中出現一道彩虹，氾濫的河水都慢慢退去。動物們好感激袋鼠東東同袋鼠西西嘅幫忙，之後佢哋嘅英勇事蹟就傳遍咗所有動物之間。

從此之後，袋鼠東東同袋鼠西西雖然有陣時都係會鬥吓嘴，但係大多數嘅時間佢哋更加鍾意用自己嘅雙手去創造自己鍾意嘅嘢或者做啲佢哋覺得更加有意義嘅事情，有陣時會幫助其他小朋友，同埋嘗試一齊跳去唔同嘅地方，萬一再次發生天災意外，袋鼠們就可以再次出嚟引導大家去安全嘅地方。有好多事情等着佢哋去體驗，至於邊個做哥哥邊個做細佬？，佢哋已經唔係咁在乎啦。

--

Hosting provided by SoundOn