【詩名】：桂花芳內兮話

【作者】：林鳳珠

【詩文】：

你佇桂花芳內工作一下晝

整理一個小小兮花園

修剪一寡也長長兮野草

我佇桂花芳內看你工作一下晝

釘一個舊柴做兮籬笆門

擺幾粒也咱會當坐兮石頭

咱佇桂花芳內做夥一下晝

奚清清兮桂花芳

親像直合咱講秋天已經屆

對春天來屆秋天

我伴你買花種花聞花

伴你買草種草修草

伴你看閃過天邊兮流星

伴你看欲落山兮日頭

只是

滑稽兮人兒啊！

我敢會當一直伴你伴屆老老老？

註：台語文用字尊重作者原創，不做更動，如有疑問請查詢教育部《臺灣閩南語常用詞辭典》網站。