【詩名】：國道八號

【作者】：劉惠蓉

【詩文】：

白雲輕輕

倚過天的胸坎

藍色的天

嘛聊聊仔將雲攬

無情風貼佇耳空邊

聲聲句句欲共雲𤆬走

目睭沙微的日頭

恬恬探頭講欲留

蒼天一陣 喉管滇

無志氣的目屎嘛直直流

春天躊躇的跤步

參著雨水

四淋垂綴咧吼

這條徛佇台南的八號公路

抑是無情放伊去

上北落南 行東往西

來來去去 依依難捨

抑是無情放伊去

國道八號啊~你敢攏毋知

敢毋知影

阮有偌濟的毋甘

只有綴空中的雲徙過台江

這條引阮思戀

行袂開跤的公路

故鄉永遠的情路

若坐雲霄飛車的台江大道

這條南台灣 思戀的八號公路

圖片來源：國道新建工程局

註：台語文用字尊重作者原創，不做更動，如有疑問請查詢教育部《臺灣閩南語常用詞辭典》網站。