By Praveen Aathavle

गुरुवरा वरदान हे प्रेमे मज द्यावे ।

हृदयी माझ्या नित्य राहूनी पदी मजसी ठेवावे ।।धृ.॥

हृदयमंदिरी तुझी प्रेममूर्ति । नित्य जागवी तुझीच प्रीती ।

त्या प्रेमाचा अनुभव घेण्या पदी तुझ्या यावे ॥ 1 ॥

प्रेमरूप तू प्रेम माझेवरी । प्रेम माझे तव रूपावरी ।

प्रेमावरती प्रेम जाऊनी प्रेमी त्या बुडावे ॥ 2 ॥

अनुभव तुझा तू प्रगटविसी । अज्ञानासी पूर्ण हटविसी ।

ज्ञानप्रकाशी तव हृदयीच्या प्रेमासी पहावे ॥ 3 ॥

स्वरूप तूझे आनंदघन । लाविसी मज ते अनुसंधान ।

सर्व वृत्ती सर्व भाव तव भजनी लागावे ॥ 4 ॥

भक्तहृदयी श्रीगुरुमूर्ति । गुरुपदी प्रेमे जडली भक्ती ।

परमानंदावरती प्रेम नित्यचि वाढावे ॥ 5 ॥