လာမယ့် ဇန်နဝါရီလ ၁၄ ရက်နေ့ မြန်မာစံတော်ချိန် မနက် ၇ နာရီခွဲအချိန်ကိုရောက်ရင် ONE FIGHT NIGHT-6 ကိုယ်ခံပညာစုံ တိုက်ခိုက်ရေးပွဲစဉ်ကို ကြည့်ရှုရပါတော့မယ်။ အဲ့ဒီပြိုင်ပွဲမှာ မြန်မာပရိသတ်တွေ စိတ်အဝင်စားဆုံးအဖြစ် ရှိနေတာကတော့ ကချင်တိုင်းရင်းသား ကိုယ်ခံပညာစုံတိုက်ခိုက်ရေးသမား အောင်လအန်ဆန်းရဲ့ပွဲစဉ်ပါပဲ။ 

အောင်လအန်ဆန်းဟာ ဒီတစ်ကြိမ်မှာတော့ ထူးထူးခြားခြား CATCHWEIGHT တန်းပွဲစဉ်အဖြစ် ထိုးသတ်သွားမှာပါ။ ရင်ဆိုင်ရမယ့်ပြိုင်ဘက်က ဘရာဇီးကိုယ်ခံပညာစုံ တိုက်ခိုက်ရေးသမား ဂီလ်ဘာတို ဂယ်လ်ဗာအို ဖြစ်ပါတယ်။ 

အစောပိုင်း ပွဲစဉ်ထုတ်ပြန်ချိန်တုန်းက အောင်လအန်ဆန်း ထိုးသတ်ရမယ့်ပြိုင်ဘက်အဖြစ် ထွက်ပေါ်လာခဲ့သူက တရုတ်ကိုယ်ခံပညာစုံတိုက်ခိုက်ရေးသမား ဖန်ရောင်း ပါ။ ပြိုင်ပွဲထိုးသတ်ဖို့ ၁၀ ရက်အလိုကိုရောက်မှ ဖန်ရောင်းက Covid-19 ကူးစက်တာ ခံထားရတဲ့အတွက် အောင်လအန်ဆန်းရဲ့ ပြိုင်ဘက်က အပြောင်းအလဲဖြစ်သွားခဲ့တာ ဖြစ်ပါတယ်။ 

အခု ရင်ဆိုင်ရမယ့် ဂယ်လ်ဗာအို ဟာ ကိုယ်ခံပညာစုံတိုက်ခိုက်ရေးလောကရဲ့ဝါရင့်ကစားသမားတစ်ယောက်ပါ။ သူ့ရဲ့ကစားသမားဘဝဖြတ်သန်းမှုတလျှောက် ၁၃ ပွဲဆက်တိုက် ရှုံးပွဲမရှိ ထိုးသတ်ပြီး မှတ်တမ်းကောင်းတွေကို ရရှိခဲ့ဖူးသူဖြစ်ပါတယ်။ 

ပြိုင်ဘက်ဖြစ်သူကို နောက်ဆုံးပွဲချီဆီ ရောက်တဲ့အထိ ထိုးသတ်ရအောင်၊ သက်လုံကျဆင်းသွားအောင် ဆွဲခေါ်တတ်လေ့ရှိပြီး အဲ့ဒီနောက်ဆုံးပွဲချီဆီကိုရောက်မှ အမှတ်အသာစီးနဲ့ အနိုင်ရအောင် ဂယ်လ်ဗာအိုက စွမ်းဆောင်ပြတာတွေ ရှိခဲ့ဖူးပါတယ်။ 

ဒါတွေကို အောင်လအန်ဆန်း သတိထားရမှာပါ။ သေချာတာကတော့ ဂယ်လ်ဗာအို ဟာ အောင်လအန်ဆန်းအတွက် ခက်ခက်ခဲခဲ ယှဉ်ပြိုင်ရတဲ့ ပြိုင်ဘက်တစ်ယောက်ဖြစ်လာနိုင်တယ် ဆိုတာပါပဲ။