Hin gyðinglega hátíð Hanukka, sem kölluð hefur verið ljósahátíð á íslensku, hefst við sólarlag 10. desember og henni lýkur 18. desember. Hátíðin er haldin til að minnast þess þegar musterið í Jerúsalem var endurvígt á 2. öld f. Kr. eftir að Júdas Makkabeus og uppreisnarlið hans höfðu unnið sigur á Selevkídum, en þeir höfðu bannað Gyðingatrú og vanhelgað musterið. Flutt verður tónlist sem tengist ljósahátíð Gyðinga, þar á meðal söngvar eftir Solomon Ancis, Flory Jagoda og Chaim Ritterband. En einnig er til tónverk eftir kristið tónskáld sem fjallar um sigur Makkabea: óratórían „Júdas Makkabeus“ eftir Georg Friedrich Händel. Umsjón með þættinum hefur Una Margrét Jónsdóttir og lesari er Anna Marsibil Clausen.