我的面冊最近跳出一篇十冬前寫的網誌，是一個醫生朋友來介紹彼時陣大腸癌治療的方式。過去十冬矣，大腸癌仝款是咱台灣發生率跟死亡率排前三名的癌症。規場演講內底，予我印象上深刻的，就是用貴參參的藥仔治療了，干焦會使加活幾個月到一二年爾，按呢這款藥仔怹嘛叫做有效！面冊已經無網誌這個功能矣，我仝款共co出來貼佇這篇文的下跤。最近有想到一個如何看待咱身上病疼的觀念，家已感覺誠有道理，就講出來跟逐家分享一下。前一陣仔佇咱的過年歇睏日，有跟幾個大學同窗翁仔某約出來開講，這個歲數講的較濟攏是跟健康有關係，開講到落尾，現場的幾個同窗會共我這隻老羊剾洗，我若叫怹莫遐趕緊去看醫生的時陣，怹就會同齊講「這叫做『「人體自癒』啦」！我知影這是因為同學之間有夠熟，就算講不認同我的看法，怹嘛袂用會拍歹感情的方式來黜臭我。是按怎我會叫人莫磕袂著就想欲去揣醫生？我捌看過有一個講法叫做「好轉反應」，意思就是咱身軀今馬出現的這個症頭，雖然予咱感覺無爽快，但是是身軀咧變好的過程。有人一定會問講，明明遮爾仔無爽快，咱是欲按怎知影身軀是咧變好抑是咧變䆀？譬如講咱若檢查到咱的血變濁，是因為身驅當咧清歹物仔，共毒素排出去造成的？抑是顛倒是咱食到歹物仔，身軀當咧吸收毒素造成的？我最近的感想是：一定攏是咧變好的過程！因為變䆀的時陣，較濟是袂予咱發覺到，攏是身體平衡的運作出問題矣，咱的細胞為著欲活落去，器官為著欲繼續運作伊的功能，才會出現予咱無爽快的症頭。我按呢講敢有啥物根據？因為咱叫做「生物」，咱的本能是求生，無咧求死。有一句成語叫做「斷尾求生」，佇咱厝內看到的蟮蟲仔，抑是佇外口看到的杜定，攏有這款的功夫。這款的求生手段，若換做發生佇咱人的身上，一定是足艱苦的。若會使用這種觀點來看待咱身上的病疼，無爽快的症頭，按呢咱對咱的身體會閣較有信心。毋管是發燒發炎酸痛，抑是會腫會紅會癢，咱愛相信咱全身軀細胞所有的反應，攏是為著欲活落去的「好轉反應」，按呢咱心頭就會加足在矣，袂磕袂著就想欲去踅病院揣醫生矣。