قبل ما ندخل على اللي جاي… مهم نرجع نبص لورا لحظة.
مش علشان نلوم نفسنا أو نحصي اللي ناقص،
لكن علشان نفهم الصورة كاملة:

إحنا اتغيّرنا إزاي؟
مشينا قدّ إيه؟
وإيه اللي المفروض نركز عليه في اللي جاي؟

الحلقة دي مساحة صادقة،
تشوف فيها روحك بوضوح،
وتلمس تفاصيل يمكن ما أخدتيش بالك منها طول السنة.

🎧 اسمعها…
يمكن لحظة واحدة تعيد ترتيب نظرتك للسنة كلها،
وتفتحلك باب جديد للمتبقّي من عمرك.

في كل مرة تنتقل فيها لمرحلة جديدة، ربنا بيكون بيجهزك لحاجة أكبر…
مش دايمًا الطريق بيكون واضح، ساعات بنحس بتوهان أو فقد توازن،
لكن الحقيقة إن دي لحظة “تحوّل” بتكسر القديم وتفتح باب لفصل جديد في حياتك.
في الحلقة دي من حديث التغيير، هنتكلم عن “الانتقال” —
عن الشجاعة إنك تكمّل رغم الغموض، وعن الإيمان إن ربنا بيقودك بخطوات محسوبة نحو الخير اللي كاتبه ليك.

الهروب عمره ما كان حل.
اللي بنهرب منه بيكمل معانا، ونفضل شايلينه على ضهرنا سنين طويلة، لحد ما نحس إن روحنا تقيلة، ومش قادرين نكمل.
المواجهة يمكن تكون صعبة، بس هي اللي بتخفف الحمل، وبتحررنا من القيود اللي بنحطها حوالينا.
الحلقة دي دعوة حقيقية إنك توقف تهرب، وتبدأ تواجه… عشان ترتاح بجد.

في عالم بيجري بسرعة… وأصوات ما بتسكتش… ساعات بننسى أبسط وأغلى حاجة: إننا ندي نفسنا وقت.
وقت مع الذات مش رفاهية، ولا هروب… لكنه لحظة إنقاذ. لحظة نسمع فيها قلوبنا، نرتب أفكارنا، ونشحن طاقتنا من جديد.

في الحلقة دي هنغوص مع بعض في:

• ليه "Me Time" مش رفاهية… لكنه ضرورة حياتية.

• إزاي اللحظات دي بتنعكس على صحتنا النفسية والجسدية.

• مين أكتر ناس محتاجين الوقت ده فعلًا.

• وإزاي نتعامل مع اللي مش فاهمين ليه وقتك مع نفسك أولوية.

يمكن اللحظة اللي هتقضيها مع نفسك النهاردة… هي اللي تنقذك بكرة.

في وقت كنا فاكرين إننا ماشيين صح… فجأة كل حاجة اتشقلبت.
خططنا، تعبنا، تمسكنا، ورغم دا كله… الطريق خدنا في اتجاه تاني ما كانش على الخريطة.

في الحلقة دي، بنفتح باب الكلام عن الخيبات، عن "اللي ما حصلش"، عن لحظة الانكسار اللي بعديها بنكتشف نفسنا من أول وجديد.
هنتكلم عن "ليه الحلم وقع؟"، و"هل اللي حصل دا فشل؟"، ولا يمكن كان لازم يحصل علشان نوصل لحاجة أعمق وأصدق؟

لو مريت بيوم حسيت فيه إنك تايه، أو فقدت حاجة كنت فاكر إنها مستقبلك،
الحلقة دي ليك… وهتطبطب على قلبك.

🎧 استمع دلوقتي…
وسيب لنفسك مساحة تفهم، وتسامح، وتبدأ من جديد 🕊️

في اللحظة اللي نحس فيها إننا تعبنا من مكانّا، من شغل، من علاقة، من نفسنا القديمة… بيطلع قدامنا خيار اسمه: "التغيير".
بس أول ما نقرّب منه، نحس برعب غريب.
رعب من المجهول، من الفشل، من الوحدة… ومن إننا نسيب اللي متعودين عليه حتى لو مش مريح.

في الحلقة دي، هنتكلم سوا بصوت صادق وهادي عن:

• ليه بنخاف من التغيير؟

• هل التغيير فعلاً خطر… ولا إحنا اللي تعودنا على التعب؟

• وإزاي نعرف نفرّق بين الخوف اللي بيحمينا، والخوف اللي بيحبسنا؟

حلقة عميقة وحقيقية… يمكن تلمسك من جوه
ويمكن، تكون هي الخطوة الأولى في طريق التغيير اللي بتستحقه 💛

وجودك وسط الناس الصح، بيهوّن كتير من تعب الطريق…

ناس تفهمك، تسمعك، تشوفك زي ما أنت، وتشيل معاك لما الدنيا تتقلّ.

وفي الحلقة دي، بنتكلم عن العلاقات اللي بتقويك،

عن دور الأشخاص اللي وجودهم جنبك يديك طاقة تكمل،

وعن أهمية إنك تكون محاط بعلاقات داعمه تحس فيها إنك مش لوحدك.

وهنتكلم كمان عن دورك…

إزاي تكون أنت كمان شخص داعم، وجودك يفرق، وكلامك يلهم، وحضورك يطمن

أوقات نعيش حياتنا مركزين على جانب واحد… شغل بس، أو كل وقتنا للعيلة، أو دايمًا بندي من نفسنا للآخرين، ونحل مشاكل كل حد حوالينا… لحد ما نلاقي نفسنا بننهار فجأة!

السر؟ خلل التوازن.

في الحلقة دي، هنتكلم عن التوازن كأسلوب حياة… إزاي الكون كله قايم عليه، وإزاي تقدر توازن بين شغلك، أهدافك، وعلاقاتك… من غير ما تستهلك نفسك أو تضيعها.

لكل قلب مرّ بتجربة الاستنزاف…
هذه الحلقة مساحة دافئة لإعادة الاتصال بالذات، والبدء في احتضان نفسك بلُطف بعد سنين من الإهمال والتعب.
رسالة لكل من تعب من الإنكار… ولكل من يعيش الحياة بروحٍ مطفأة:
آن الأوان تستعيد نفسك… وتسترجع حياتك، خطوة بخطوة.

في كل لحظة بنبص حوالينا ونقارن توقيتنا بتوقيت غيرنا…

“ليه لسه؟”، “ليه أنا مش هناك؟”، “هو أنا اتأخرت؟”

في الحلقة دي هحكي لكم عن التوقيتات الخفية اللي بتحكم حياتنا…

عن الصبر، عن الحكمة في التأخير، عن إن كل زهرة بتزهر في موسمها.

لو تعبت من مقارنة نفسك…

لو مستني حاجة ولسه مش حصلت…

لو محتاج تطمن إنك في الطريق الصح …

🎧 اسمع الآن على حديث التغيير