合唱團甄選

八月初，朋友貼一條網鏈仔予我看，是桃園市民合唱團咧招新團員。看了心足撓的，想欲去試看覓，甄選的方式是自選曲1分鐘跟看譜演唱。有經驗的人一看就知影，這跟唱歌比賽仝款，有自選曲跟指定曲，只是指定曲換做是現場分一段樂譜予你現看現唱爾。我這個無經驗的紲憨憨，直接共想做是家己愛準備一分鐘的自選曲樂譜，看樂譜唱予老師聽。

因為家己亂想，就開始去問進前讀冊會合唱團的朋友，敢有共咱唱過歌譜留落來，會使借我佇甄選的時陣假一下無？朋友攏無人感覺奇怪，有可能干焦叫是我是欲借樂譜複習歌曲爾，一直到我問到阮𤆬團音樂老師時，伊才提醒我，樂譜是主辦單位提供，我愛現看現唱，叫我跟主辦單位確定一下。我若豆菜芽無啥會曉看，伊會使ui日本耍轉來了，才來幫我補習。

若以我較早到個性，唱歌爾就愛閣予人考試，按呢我家己佇厝裡哼就好。年歲較大了，面皮有變較厚，無定著合唱團內底，誠欠查埔聲，就算講我豆菜芽看無亂唱，老師嘛有可能會予我過關。若掠準無揀到我，上多嘛干焦是佇鬥陣甄選的人面頭前，見笑一遍爾。佳哉考試的時陣，豆菜芽無真濟，予我有夠時間，佇頂一個人咧考唱的時陣，緊算緊背。我是毋知有唱對抑毋對，但老師應該真正有同情到阮遮些少數的查埔聲，Bass跟Tenor的聲部，才會干焦攏揀到一個人爾。Tenor揀到的彼位先生，甄選時拄好坐我隔壁。

我的自選曲是清唱一段you raise me up，清唱較乾澀，佇厝裡家己錄音，就敢彈吉他，唱一段予逐家聽。