Hinir íslensku náttúrufræðingar

Þórunn Wolfram Pétursdóttir er doktor í umhverfisfræðum frá Landbúnaðarháskóla Íslands og sviðstjóri hjá Landgræðslunni. Hún hefur fjölbreytta starfsreynslu, m.a. sem héraðsfulltrúi hjá Landgræðslunni, sem aðstoðarmaður umhverfisráðherra, auk þess að hafa verið í rannsóknarnámsleyfi við eina af rannsóknarstofnunum framkvæmdarráðs Evrópusambandsins á norður Ítalíu. Henni er umhugað um sjálfbæra nýtingu náttúruauðlinda og endurheimt náttúrugæða og trúir á þverfræðilega nálgun til að ná árangri.

Að vera náttúrufræðingur er aðeins einn af höttum Jóns Björnssonar, þjóðgarðsvarðar í Þjóðgarðinum Snæfellsjökli. Í hlaðvarpinu segir Jón okkur frá hinum fjölmörgu störfum sem hann hefur komið að, á sjó og á landi, en ferill hans sem landvörður hófst á Hornströndum.

Erna Sif Arnardóttir er lektor við verkfræði- og tölvunarfræðideild Háskólans í Reykjavík. Hún leiðir stóran hóp alþjóðlegra vísindamanna í verkefninu "Svefnbyltingin" en verkefnið hefur hlotið einn stærsta styrk sem veittur hefur verið til rannsókna hér á landi úr Horizon 2020 rammaáætlun ESB fyir rannsóknir og nýsköpun. Erna Sif er líffræðingur að mennt og heillaðist að erfðafræði á menntaskólaárunum.

Kristinn Haukur Skaphéðinsson er manna fróðastur um erni á Íslandi en hann á langan starfsferil  að baki hjá Náttúrufræðistofnun Íslands við rannsóknir á þeim og öðrum fuglum í náttúru Íslands. Í hlaðvarpinu segir Kristinn Haukur okkur frá námi sínu og störfum - og  skemmtilegum fuglum sem hann hefur komist í kynni við.

Hvað eiga jarðvegur, Evrópusambandið og þríþraut sameiginlegt? Jú, þau hafa notið krafta Rannveigar Guicharnaud, jarðvegsfræðings. Hún lætur ekki landamæri eða tungumál stöðva sig og hefur sinnt margvíslegum verkefnum á sviði jarðvegsfræði, kortlagningu og samráðs. En Rannveig er einnig margfaldur Íslandsmeistari í þríþraut og hefur staðið á verðlaunapalli heima og erlendis í ófá skipti.

Ólafur Ingólfsson, jarðfræðingur, hefur farið víða til að stunda rannsóknir og vísindastörf en viðfangsefni hans eru einkum á sviði jarðsögu og jöklajarðfræði á heimskautasvæðunum. Hann hefur farið í leiðangra til Suðurskautslandsins og dvalið langdvölum á Svalbarða en hann hefur einnig stundað rannsóknir í Síberíu og Kalahari eyðimörkinni. Samt ætlaði Ólafur ekki að verða náttúrufræðingur í upphafi.

Snorri Sigurðsson hefur um árabil starfað hjá Reykjavíkurborg að málefnum er snúa að náttúruvernd og líffræðilegri fjölbreytni í borgarlandinu. Hann sinnir jöfnum höndum margvíslegri fræðslu til íbúa borgarinnar og er þátttakandi í mótun stefnu og skipulags í Reykjavík. Um þessar mundir sinnir Snorri einnig verkefni í Umhverfis- og auðlindaráðuneytinu sem snýr að nátturuminjaskrá og undirbúningi friðunar.

Bryndís Brandsdóttir jarðeðlisfræðingur er okkar helsti sérfræðingur í sjálftamælingum og hefur komið að vöktun og rannsóknum á hérumbil öllum gosum landsins síðustu 50 árin.

Þráinn Friðriksson er jarðefnafræðingur og starfar við jarðhitarannsóknir hjá Orkuveitu Reykjavíkur. Sérsvið hans hefur leitt hann víðsvegar um heiminn til kennslu, ráðgjafar og rannsókna, m.a. fyrir Þróunarsamvinnustofnun og Alþjóðabankann í Washington.

Þóra Ellen Þórhallsdóttir er prófessor í grasafræði við Háskóla Íslands. Hún hefur stundað rannsóknir á náttúru Íslands um árabil og er mörgum að góðu kunn fyrir framlag sitt til náttúruverndar. Í hlaðvarpinu segir hún okkur frá námsferli sínum, störfum og rannsóknum á hálendi Íslands og víðar.