今仔日是2024年11月8號，面冊跳出一篇3冬前寫的台文。我若台文無寫傷長，就未閣錄音唸予朋友聽。我看這篇文章內底有講到一條歌，我會記持我彈吉他唱過，而且是家己一個人唱兩個聲部合起來的。我就揣看面冊頂其它的貼文有寫到無？原來是寫佇2022年3月15號的這篇面冊貼文內底。拄好這篇嘛是短的無錄音的台文，按呢我共兩篇合做伙，濫我唱過的這條非洲歌，錄一集podcast予朋友聽。

2021年11月8號的貼文是按呢寫的。

阮讀冊會𤆬頭的退休老師阿得 莊義得 ，講伊欲組一個合唱團，這馬欠查埔，問我欲鬥陣來唱無？我掠準伊咧跟我講耍笑，後來看伊共練唱計畫貼佇line群組的記事本了，才知影伊按算欲用「刻意練習」這本冊所寫的方法，予合唱團來實驗，明年三月伊佇武陵高中讀冊會欲𤆬讀這本書，到時才順紲驗收。

這款知行合一的𤆬讀方式，嘛干焦十八般武藝攏會曉的「斜槓中年」阿得才敢搬這齣。聽講武陵讀冊會的規模是阮讀冊會的幾偌十倍大，我猶毋捌見過這款世面，第一擺去，就是欲佇台頂合唱予遐濟人聽，這款機會真正無地揣，我就潺潺共撩落去囉！

練唱的歌曲內底，有一條非洲語，是Kenya這個國家跟外國朋友相借問的歌曲，歌詞簡單，旋律樂天輕快。唱合唱會使學新歌閣順紲學另外一個國家的語言，一兼二顧，摸蜊仔兼洗褲，真值得我四十冬後重溫兒時的合唱夢。

Jumbo (哈囉！)

Jumbo bwana (哈囉！朋友！)

Habari gani (你好無？)

Muzuri sana (我真好。)

Wageni wakaribishwa (外國的朋友，莫客氣。)

Kenya yetu hakuna matata (佇阮肯亞，啥物攏無問題。)

就親像上尾這句歌詞所寫的，明年三月配合阿得老師𤆬讀的演出，百面沒問題啦！

紲落來是2022年3月15號寫的貼文。

這個世界不平靜，毋是病毒就是戰爭，來唱一條合唱團學到的非洲歌，希望這個世界會使卡快樂矣！這條歌是肯亞這個國家歡迎外國朋友的歌曲，歌詞簡單，旋律樂天輕快。家己彈，家己唱，家己合。呵呵呵！用假音唱查某囡仔部，干若咧練布袋戲咧。

請逐家來欣賞我唱的這條非洲歌。