家己真正袂慣勢掛喙罨，所以對交通部雄雄講欲坐高鐵、台鐵、公路局這款跑長途的人客，攏愛掛喙罨才會使坐的時陣，雖然咱無去予人礙到，但是聽了嘛想欲踅踅唸一下。

「欲強制人掛，喙罨佇車頭就應該予人買有才對！若有人無注意，票攏打好矣，人到車頭矣，無喙罨紲袂當上車，按呢欲按怎？」誠濟同事無認同我無咧掛喙罨，足驚我會是防疫破口，聽到我咧雜唸，就有人講「台灣鯛閣咧發作囉！」。

「若啥物代誌攏愛準備好才會使講，按呢政府就攏免作穡矣，咱愛共體時艱啦。」唉！這就是我上驚發生的代誌，無采咱台灣為自由民主拍拼遐濟冬，予這個病毒嚇驚了紲倒退幾若步。

毋知佇咱台灣得這隻病毒的人內底，彼幾個揣無予誰穢到的，抑是佇國內予人穢到的遐的病人，平常時佇外口出入公共場所，敢攏有佮喙罨掛牢牢？新聞敢若毋捌報過。若是有，那會同款予人穢到？按呢喙罨毋就咧掛心適的？像我這款掛袂牢的人一定按呢想。我會記的有兩三個護士嘛去予病人穢到，護士掛喙罨應該攏比咱較頂真。我嘛知影叫咱愛掛的人會講啥，怹一定講連掛牢牢的人就會去予人穢到矣，你閣毋掛？

有人講你是雞仔腸鳥仔肚爾！一個喙罨才幾箍銀爾，有通計較遐濟？無我送你好了；嘛有人講你袂使干焦顧你家己快活，萬一你是帶病閣兼無症頭，無掛喙罨閣四界走，按呢予你穢到的人毋就加衰？醫護人員已經無閒熾炒，你閣佇遐咧夯枷！這嘛是咱上煩惱的另外一件代誌，人跟人作伙的社會信任崩了了矣，無定著以後喙罨是出門必要的穿插，無掛會予人當作變態，告你妨害風化，癩疴兼無衛生，報警察佮你扣起來。

這馬是新病毒全世界當咧湠的時陣，新聞逐工咧報佗一國閣著幾個，死幾個，其實這個世界，逐工攏有人得各種病，有人因為各種原因來過身，無的確過幾年了閣轉來看這時陣的統計，凡勢全部破病的人數無加佮濟，全部過身的人嘛無加幾個，咱才知影這時陣咧家己嚇驚家己，咱是付出偌大的代價。