Johnny singer 81

حياة فارس مهزوم - وبأبكي

Listen Later
وبأبكي لو بعدتي فـ يوم
عشان عايزِك تضمِّيني
وبأبكي لو رجعتي فـ يوم
عشان خايف تفارقيني
وبين الشوق وبين الخوف
دموع جوَّايا بتماطل
بتسرق من عيوني الشوف
أشوف كلّ الوجود باطل
ولمَّا الليل فـ روحي يزوم
وتعلى حيطانُه قدامي
بأطاردِك فـ الدروب مهزوم
وأقابلِك جوَّه أحلامي
وأغنِّيلِك بصوت مهموس
وكفِّك نور على جبيني
ماليش غيرِك فـ ليلي شموس
مافيش غيرِك بيحييني
هنا فـ الحلم نتلاقى
وأفارق فيكي أوهامي
هنا ويَّاكي بأتشاقى
هنا على كتفي بتنامي
وأغنِّيلِك بصوت هامس
يعود الفجر من تاني
تردِّي بضحكة نتلامس
تنام جوَّاكي أحزاني
هنا فـ الحلم نتلاقي
وأفارق فيكي أوهامي
هنا ويَّاكي بأتشاقى
هنا على كتفي بتنامي
هنا فـ الحلم بألقاكي
عشان مابكيش
هنا فـ الحلم ويَّاكي
حبيبتي بأعيش
.........................
كلمات وألحان: أنطونيوس نبيل
توزيع: محمد يسري
...more
View all episodesView all episodes
Download on the App Store
Johnny singer 81By Johnny singer 81