Við byrjum í dag á nýrri íslenskri tónlist, heyrum svo nýja finnska tónlist og í seinni hlutanum er það svo Gospel-tónlist. Rokkland var á Reeperbahn Festival í Hamborg í þýskalandi fyrir hálfum mánuði og þar spjallaði umsjónarmaður við náunga sem heitir Niko Cangas og starfar við það að breiða út finnska músík-fagnaðareridnið. Hann vinnur hjá útflutningsskrifstofu finnskrar tónlistar og einbeitir sér að poppi og rokki. Hann valdi fyrir okkur fimm hljómsveitir og listamenn sem eru að gera það gott um þessar mundir og við heyrum í þessu fólki í þættinum. Svo er það hann Óskar Einarsson Gospel-kóngur Íslands. Hann er gestur Rokklands í seinni hlutanum og talar um gospel fyrr og nú og velur nokkur lög og listamenn til að spila. Óskar stjórnar tónleikum sem fara fram í Lindakirkju í kvöld þar sem taka á ofan fyrir þremur drottningum; Arethu Franklin sem var drottning sálartónlistarinnar, Mahaliu Jackson drottningu Gospel tónlistarinnar og Sister Rosettu Tharpe sem var eiginlega guðmóðir rokksins. Óskar fræðir hlustendur um Gospel og velur nokkur lög með þeim bestu. Vök, Teitur Magnússon, Guðrún Gunnarsdóttir, Stafrænn Hákon og Ylja koma líka við sögu.