俗語講老人的記持是「見講講過去，現講現袂記」古早的代誌記牢牢，今馬的代誌袂記持了了。這種現象，咱若ui現代人已經機不離身的手機仔來了解一下，應該就會使理解，這款記持的問題是按怎造成的？咱家己嘛會使盡量避免這種老化的現象，發生佇咱的身上。

手機仔已經是現代人誠重要的生活用品，伊除了予人跟人之間會使隨時聯絡會到之外，伊嘛會使幫助咱記誠濟生活中想欲記起來的代誌，上捷用到的就是翕相的功能。較早若驚會袂記持的代誌，咱攏是會先提紙筆來共抄起來，今馬較簡單，手機仔提出來先翕才講，以後若有用到的時陣，才ui手機仔內底的相簿反出來看。

除了免用抄的用寫的就會使共物件翕起來囥，今馬去𨑨迌的相片嘛攏無人咧洗矣，用手機仔翕了，囥佇手機仔內，欲看隨時就有通看，嘛會使隨用網路傳予別人看。手機仔會使囥偌濟物件、資料、記錄，跟伊的記憶體有關係。

每一支手機攏有記憶體存量大小的限制，開較濟錢的手機仔就有較大的記憶體通用，各種哩哩叩叩的相片、影片、文件檔案，就會使囥較濟。手機仔用久了，咱若無去整理內底的資料，共一寡已經無需要，用袂到的物件刣掉，記憶體賰的空間就愈來愈少。若新的相片、影片、文件檔案需要較大的記憶體來囥，按呢手機仔就會共你講空間無夠用，叫你愛刣掉一寡舊的資料，才會使囥新的落去。

人食老，頭殻內有記持的代誌，就敢若手機仔用久了，賰無偌濟的記憶體仝款，猶記牢牢的攏是舊的資料，若舊的資料毋甘共刣掉，冗一寡大腦記持的空間出來，按呢新的資料會因為大腦記持無夠用就囥袂入去，這就是人講的「見講講過去，現講現袂記」的食老現象。

若欲避免這款問題發生佇咱家己，抑是咱親情朋友的身上，咱的大腦就愛跟手機仔的記憶體仝款，清掉一寡無需要無路用的資料，才會使閣貯新的資料入去。清手機仔的資料誠簡單，無想欲留的相片影片刣掉就好，但人的頭殻是欲按怎才會使來刣掉遐的無需要無路用，免閣留落來的記持咧？

彼工，阮讀冊會去共梁玉明老師座談，阮某有問老師一個問題，若有人對家己古早時代，予大官小嬸虐待苦毒的過去記牢牢，佇厝裡若錄音帶，定定會放予序小聽，按呢欲按怎來處理？老師講，遐就是咱做序大人的無法度放下，伊的過去無過去，咱就聽伊講，予伊心內的鬱卒，有所在通敨，莫共阻擋......。「伊已經講五十外冬矣，阮姐仔跟伊蹛做伙，聽甲足煩，攏會叫阮母仔莫閣講矣！」

無法度過去的過去，就是記憶體內底遐的無路用的舊資料，老師講的，共過去的代誌放下，就是共記憶體內底，無需要無路用的資料刣掉的過程。頭殻內的舊資料，若是遐的沓沓滴滴無嗒無屑的小事，咱的大腦有自動整理的功能，愈早的沙屑物仔會刣掉愈濟。上害的是彼種會深深影響到咱的情緒，抑是大起大落的大刺激，咱大腦的自動整理功能就無法度應付，咱若閣定定提起來雜唸，抑是用逃避暗崁的方式對待，伊有可能霸佔咱大腦的記持空間會愈來愈大，人就破病矣！就敢若電腦抑是手機仔中毒仝款，無辦法正常運作。

已經過身的聖嚴法師，捌教咱用四他的方法，來刣掉頭殻內遐的舊的䆀的資料。四他就是「面對他，接受他，處理他，放下他」會當放下就是共舊的䆀的記持刣掉矣。其中，我感覺「處理他」的方法，就是轉念，嘛是梁玉明老師佇伊的冊中，用足濟伊跟怹母仔、怹阿爸、怹翁、怹查某囝的故事，來講予咱知，教咱如何來轉踅咱的念頭。知影愛轉念，就是咱有自我的覺察；會使予咱的想法，踅對好的方面，按呢咱頭殻內就袂去囤遐的無路用的糞埽矣。大腦的空間清出來，自然咱就會想欲去學去記較濟較新的思想、觀念、知識，用閣較有智慧的方式，來過咱的幸福生活。

落尾，我放彼段梁玉明老師回答阮某的錄音來共逐家分享。