合唱團的小班長跟阮查某囝是佇桃園的高中讀仝屆的，有一工，伊佇line群組內底開講，講到怹母仔咧共逼婚，問看伊有欲去參加，辦佇蘆竹的聯誼活動無？我看了就隨去網路頂揣看是誰辦的？因為我嘛是蘆竹區民，哪會攏毋知這款活動？揣了才知，是蘆竹區公所辦予猶無交往對象的朋友參加的，猶閣會使報名。舉辦的時間是2月倚西洋情人節的附近，意思是有伴的人去過情人節，無伴的人就去參加聯誼活動揣一個伴。

我急咧揣毋是我家己想欲參加喔，我死會三四十冬矣，我是看阮查某囝會想欲參考看覓無。結果參加的人有年歲限制，若用生肖算虛的，伊拄好會使報名；若算法定年齡，伊就愛倚今年底才有夠歲數。我共網鏈仔貼去群組，小班長就問我，阮查某囝是毋是跟伊仝款歹命，規工咧予序大人逼婚？哪有可能！熟識我較久的人一定攏袂按呢想，因為像我遮爾綴會到時代新觀念的人，是袂去用過時的傳統，來壓迫今馬的少年人。像交男朋友、結婚、生囡仔這款話題，我是袂用老爸這個身份，來共阮查某囝問遮的代誌，予伊因為我的向望，承受無形的壓力。

我會記持我少年時陣，阮序大人攏毋捌問過我男女朋友的代誌，顛倒是我家己會煩惱，人攏咧交女朋友，我連跟查某囡仔講話就毋敢！按怎才會使交到女朋友？交往遐久矣，是毋是愛共人娶入門矣？結婚了就愛緊生一個，趁序大人猶有體力，會使幫咱鬥搖飼。這些代誌，若親像是天生自然的，是咱做一個人的本分，自頭到尾就毋捌想過，這是毋是序大人用怹傳統的社會價值觀，硬欲加佇咱的身上，造成咱若無跟別人仝款綴咧按呢做，就愛承受今馬一寡進步人士所講的「社會結構性壓力」。

結構性的意思，是社會普遍存在的現象，雖然講是普遍存在，但不可能是百分之一百攏生做仝款，有一寡舊社會認為是覺醒的人，開始反抗這款結構性的壓迫，想欲來改變，想欲拍破這個結構，建立一個新的價值觀。我家己認為我是一個會當接受新觀念的人，做業務，參加讀冊會，盡量去接觸成長背景觀念思想跟咱無仝的人，希望咱的社會環境，攏是用尊重的方式，去對待各方面跟咱無仝款的人。

社會氛圍的改變，咱是感覺會到的，不管是父權、女權、同志、性別平等、族群融合、婚姻、生育、保護環境.....等等，跟以早比較起來，今馬誠濟人的觀念攏已經真開明矣，會當接受跟咱的觀念有無仝款的主張。經過遮濟冬的變化，社會結構一定是跟以早無仝，按呢新的結構，敢會閣造成活佇今馬的人，新的壓力咧？

最近美國的新總統川普就任，一就任就簽署百外項行政命令，開始兌現伊佇選總統時陣所開的支票。有人講這遍伊會閣選牢，是美國的保守派，極端右派，民粹、保護主義的攑頭。我個人的感覺是，新的結構對一寡人已經產生新的壓力，物件若講了傷過頭濟，會予人聽了厭疝。尤其是政府的政策，若閣直直對一爿敧過，按呢另外一爿的人，就會跟當初彼陣舊社會認為是覺醒的人仝款，開始反抗新的結構性壓迫。

會時行流行的物仔，若用到古早的元素，咱會講是復古，抑是結合傳統的創新。但若是跟政治、社會價值觀有關係的議題，就無遐好聽的講法，定定會諍到大聲細聲，指控對方無開明，袂進步，老番癲，講袂翻捙。莫怪佛法講，修行愛行中道，毋通偏執佇兩爿。咱做任何代誌，過猶不及攏是無好的。俗語講「磨刀恨不利，刀利傷人指」咱若想欲予這個社會變較好，毋是跟咱仝爿的攏愛100分卯贏的才會使，有可能是拄好過關的分數，意見無仝的人攏會當接受，拄拄仔好才是上好。

佇新的社會結構之下，除了會使用佛法的中道思想，來互相尊重無仝的看法，我佇讀冊會讀到的知識，嘛會使幫助咱個人，面對社會結構變化的時陣，會使較自在些。佇「打造你要的人生」這本冊內底，作者講咱人若傷過頭掛意別人對咱的看法，咱就袂快樂；規工咧煩惱「我表現了按怎？」「我有符合親情朋友的期待無？」「別人是按怎評論我的？」咱就會感覺生活攏去予人綁牢牢，無個人的自由。這款無形的壓力，若是普遍存在佇這個社會，就是咱所講的結構性壓力。

別人欲按怎想按怎看，毋是咱會使控制的，根本就跟咱無底代，就算咱做到流汗，嘛一定有跟咱無對盤的人會嫌到流瀾。咱的情緒，咱的生活步調，免因為別人對咱看法的好䆀就起起落落。咱只要分予清楚，啥物是咱會使控制的？咱共氣力囥佇遮就好，按呢無論社會結構按怎變化，咱攏會使自在面對。