Send us a text

咦！點解唔係余Sir余德淳講座錄音？大家好，我係Eddie 雷寶生，呢條頻道我2019年攞到余Sir同意將佢係 youtube上面影片製作成podcast，而我改名為 Good Vibes 有個好心情都因為余Sir講到任何話題比如夫妻關系、兒女關系、上一代同下一代關系、職場關系等等，處理好呢段關系固然會有好心情，但先有好心情先去處理更加重要。

不過早兩年發現余Sir講座或講道影片係youtube上已經唔容易揾到，如果大家有揾到而我呢個頻道冇，請大家話我知，我本身做廣告創作，數一數已經三十幾年，認識余Sir都因為一位已經返咗天家好朋友羅慧娟(Jac)介紹，Jac 17歲時已經認識佢，一直我開自己公司後因為工作關系來往多咗，當時知道佢信咗基督教成為基督徒，雖然大家唔同教會，但大家關系係咁多年後先正式開始，2003沙士我哋三個，Jac、余Sir及我聯合出品 “解悟AQ奧秘” 一連八集DVD，余Sir負責內容、Jac出鏡做主播，而我就負責製作及生產。

當時沙士香港確係人心惶惶，我哋三個用自己善長能力希望係呢個時間做啲貢獻，成效會有幾大我哋冇諗太多，我哋用咗三個月時間連後期製作，DVD面世後Jac揾傳媒好朋友幫手宣傳，呢個project大家冇賺錢，嚴格呢講係蝕錢。

但呢套DVD係二十幾年後我攞返嚟睇都好有價值，幾年前我曾經將DVD全部內容放係Youtube 比大家免費觀賞，可惜收到 Youtube通知余Sir機構投訴我侵權，要我下架，雖然我覺得奇怪，影片都放咗Youtube咁多年，可能係功成身退時候，我就無再紏纏將影片下架，直到最近我係Youtube希望揾到余Sir影片放係podcast同時，我就諗點解唔將呢套DVD內容都轉成Podcast比大家聽，聽下二十幾年前余Sir提供乜嘢方法比大家扺抗逆境，當年沙士近年學運再加上Covid，逆境似乎冇離開過我哋，好期待一連四集解悟AQ奧秘可以幫到大家重拾好心情，亦都透過呢四集內容懷念一下Jac聲音，今集講扺抗逆境第一個心態準備，就係勇氣，大家一齊嚟聽下。

Support the show

一位好朋友羅慧娟介紹下認識余Sir，娟妹返天家都十多年，大家係沙士時一齊制作節目，希望為當時香港打氣，大家都唔計較付出，只係擺個心出嚟做事，一段長達二十多年友誼就咁開始，因為係 youtube 經常聽余Sir講道，有時真係唔太方便，倒不如自資幫余Sir成立呢個podcast，亦得到余Sir同意授權，Good Vibes Podcast 就係咁成立，希望大家能透過余Sir另一種角度去演譯 神話語，即使碰到任何問題或逆境，都可以有個好心情去面對！