有一工，辦公室的冷氣歹去，同事攏咧搶電風吹，我無欲直接吹到風，就換位坐，有噴到風尾仔就好。助理看我直直擦汗閣無愛吹電風就問我：「流汗毋是真無爽快？」「袂矣，我真佮意流汗。」「那有可能，汗攏黏黏，流汗會予人感覺足齷齪矣！」「咦？我的汗不是黏的耶！而且會感覺著毛管空攏予汗洗甲足清氣矣。一定是妳傷少流汗，毛管空攏無咧清，窒傷濟垃圾物仔，汗才會變黏黏。」

助理予我一個伊問毋對人的表情了，就無欲繼續跟我啼矣。其實，我毋是跟助理咧滾耍笑，毋知是個人的體質無仝？抑是我家己的錯覺？我是真正感覺流汗就敢若是咱身軀家己的自動清洗功能仝款，不但有咱定定聽人講的體內排毒爾，對皮膚表面的毛管空，嘛會清甲足清氣矣。因為按呢，我已經十年以上不咧用雪文、茶箍、洗頭毛精，干焦用清水洗頭佮洗身軀矣（ https://goo.gl/FkccrX ）。

彼工中晝跟同事開講，聽到怹講禁尿對咱的健康無好，我就隨共同事問「禁尿不好，阿禁汗咧？是毋是仝款對身體無好？」同事隨共我應「汗是欲按怎禁？」我解釋予聽「禁尿是身軀想欲放尿的時陣，你無去放；若身軀愛流汗的時陣，你無愛予流，整天覕咧吹冷氣，抑是電風直接用颺矣，予汗流袂出來，按呢毋是叫做禁汗無是叫啥？」雖然是歪理，但是聽到的人，應該會使感受到無流汗跟禁尿仝款，對咱身體嘛是無好矣。

干焦欲推捒一個「佮意流汗」的觀念，希望身軀邊的親情五十，會使莫因為流到規身軀汗就起煩惱心，攏愛靠外口的冷氣電風，才會使予咱內在的心安定落來，我就發覺會當接受的人誠少，若是另外一個更加挑戰人破病就愛去病院這款理所當然的觀念，恐驚我會予人當做是極端討厭去看醫生的份子。

這幾冬有拄著一寡仔親情朋友，家己並無感覺身軀佗位有重耽，但是健康檢查講伊有毛病，伊就去做手術治療矣。有人運氣較好，誠緊就恢復健康，有人運氣較䆀，做了就開始佇病院出出入入，甚至有人因此就過身。今馬的病院攏誠尊重病人家己的意願，所以我是袂用我家己的看法，去影響當咧破病的人。只不過，這款代誌總有發生佇家己身上的一工，我必需愛問家己，若這的病疼發生佇我身上，我會按怎做？而且愛予我身軀邊所有愛我關心我的人知影我的意志跟決定。

我絕對相信醫生的專業判斷，但我會先相信我家己身軀的感覺。咱若感覺身軀佗位有重耽，我會家己先用心觀察，這個現象是暫時的？仰是久長的？若是久長的，會使跟咱好好鬥陣無？抑是咱會有生命危險？是毋是身體咧共咱提醒咱的生活習慣傷匪類？愛來改無？咱若行一條跟咱今馬的生活習慣完全倒反的路，是毋是會減輕這個現象的發生？

病人較濟攏毋敢無聽醫生的話，除了是尊重專業之外，我感覺「驚死」是一個上大的原因。若是醫生講咱的肺部有烏影，抑是肝的切片是歹物仔，敢有人敢無愛手術？大部分的人攏毋敢，因為以癌的湠開速度來看，干焦死路一條爾，無論是對人世間的貪戀，對親人的毋甘，抑是對死亡的無知，人攏是驚死的，我嘛仝款。不過，加讀一寡冊會使增加咱對死亡的熟識，閣再加上有真濟人接受治療犧牲生活品質了嘛無恢復健康，予我更加體認到生命就是一條單行道，一旦你選擇手術後化療這條路，無論結果是好是䆀，你就毌知影無做手術干焦改變生活習慣的後果會變按怎？

所以，我問我家己，若醫生講我的肺部有烏影，抑是肝的切片是歹物仔的時陣，就算講阮丈人食到80歲，伊嘛接受予醫生開刀，共伊的肺跟肝生的歹物仔切掉，而且今馬唱歌仝款丹田有力閣旺聲；我的答案是，我會選擇相信家己的身體，無欲開刀手術，是用改變生活習慣的方式用心觀察，若真正是死劫難逃，按呢就安心接受吧。