Á þessu ári eru 100 ár frá fæðingu söngvarans Jóns Sigurbjörnssonar. Jón var einn besti bassasöngvari Íslands á 20. öld og einnig lærður leikari, fór með mörg hlutverk bæði hjá Þjóðleikhúsinu og Leikfélagi Reykjavíkur auk þess sem hann leikstýrði ófáum verkum. Af óperuhlutverkum Jóns má nefna Sarastró í „Töfraflautunni" eftir Mozart 1956 og Basilíó í „Rakaranum í Sevilla" eftir Rossini, en það hlutverk söng Jón tvisvar, fyrst í Þjóðleikhúsinu 1958 og svo hjá Íslensku óperunni 1984. Einnig eru til margar hljóðritanir af flutningi Jóns á íslenskum einsöngslögum. Á leiksviði fór hann með fjölmörg hlutverk og lék til dæmis Skugga-Svein í samnefndu leikriti Matthíasar Jochumssonar þrisvar. Þá kannast margar kynslóðir íslenskra barna við rödd Jóns í hlutverki bangsapabba í „Dýrunum í Hálsaskógi" eftir Thorbjörn Egner, en sú hljóðritun var gefin út á hljómplötu árið 1966. Fjallað er um Jón Sigurbjörnsson í þættinum og fluttar hljóðritanir af leik hans og söng. Umsjón með þættinum hefur Una Margrét Jónsdóttir, en lesarar eru Björn Þór Sigbjörnsson og Jónatan Garðarsson.