牽仔跟恩愛農場的櫻花無啥有緣，上早是七年前佇228拜六去跟人塞車看無成，改去較山跤賰較少花的櫻木花道飲咖啡（ https://bit.ly/4bfegOw ）。閣來是五年前佇上班日拜四透早，想欲趁人猶未出門上班，車較少的時陣上山，結果伊爬未起床，干焦賰查某囝陪我去爾（ https://bit.ly/3D6WCA1 ）。雖然彼工有落雨，但櫻花開規遍的就是好看，牽仔無看到真替伊拍算，另工一定愛閣招伊來看才會使。這遍是佇這禮拜二，我看外口有出日頭，天氣袂䆀燒熱燒熱，就用手機仔查恩愛農場的面冊迷眾頁，貼文有寫講2/25-3/10是今年怹的櫻花可能開花的時間，拜二是2/25，拄好是頭一天。按呢會使等牽仔跟查某囝怹早頓食飽，聽候上班塞車的時間過了，喝行就行。結果，2點偌鐘的山路，駛到山頂紲看到規農場的櫻花攏猶未開！

出外𨑨迌就是按呢，路頭遐遠就駛到位矣，袂使講看無櫻花開咱就家己拍歹心情。我看手機仔的時間已經12點半，人講食飯皇帝大，有花無花等咧再講，腹肚先顧乎好，起毛就會婸。農場的餐廳有開，咱就來共交關一下。頭家無咧予人點菜，就是人講的無菜單料理，算人頭，一個人500，阮三個人，伊攢六菜一湯予阮。對阮三人的食量來講，誠腥臊，第一擺食到彩虹鱒魚，牽仔感覺肉質袂䆀，問頭家才知影是叫啥物魚。一大盤高麗菜捀出來的時陣，服務員特別共阮注文，高麗菜食無夠會使閣添。今馬當對時閣大出的高麗菜就是好食，阮當然嘛是窮了了閣予頭家加炒一盤請阮。

食飽矣，規個人攏快活起來，無花的景看起來嘛誠爽快，四界行行踅踅了，好哩佳哉，隔壁的觀星露營區的櫻花已經開矣，阮就徙位來去無人露營的露營區跟花翕相，予這工喝行就行的賞花行程有一個圓滿的ending。